ڕاستەوخۆ

2018...ساڵی كەوتنەوەكاری مەكینەی تیرۆركردنی بەرهەڵستكارانی ئێران لە باشوری كوردستان

پێش 3 هەفتە نەوا-محەمەد حەسەن

رۆژهەڵاتیەكانی دانیشتووی باشوری كوردستان لەكاتێكدا ماڵئاوایی لە ساڵی 2018 دەكەن، ئەو ساڵە بۆ ئەوان بەبیرهێنەرەوەی نەوەدەكانی سەدەی رابردوو بوو، ئەمەش بەهۆی ئەوەی لەم ساڵەدا ژمارەیەك چالاكوانی سیاسی و مەدەنی بەرهەڵستكاری حكومەتی تاران شەهید یان برینداربون.
رۆژی 3ی ئاداری ئەمساڵ و بەهۆی تەقینەوەی بۆمبێكی لكێنراو بە ئۆتۆمبێلی سەڵاح رەحمانی ئەندامی حزبی دیموكراتی كوردستانی ئێران "حدكا" لە شارۆچكەی بنەسڵاوەی هەولێر، خۆی و كوڕەكەی بە سەختی برینداربوون و پاش رۆژێك لە مانەوە لە نەخۆشخانە، كوڕەكەی بە ناوی سەباح ژیانی لەدەستدا.


چوار رۆژ دواتر و لە رۆژی 7ی ئادار لەنێوان بالیسان و چوارقوڕنەی دەڤەری راپەڕین، تەرمی قادر قادری یەكێك لە فەرماندەكانی حزبی دیموكراتی كوردستان "حدك" دۆزرایەوە، كە شوێنەواری 21ی گوللـەی پێوەبوو.


لە 19ی مانگی ئاداردا حزبی دیموكراتی كوردستان "حدك" راگەیەندراوێكی سەبارەت بە دەستگیركردنی پێنج تۆمەتباری‌ دۆسیەی كوشتنی قادر قادری بڵاوكردەوە، كە تێیدا هاتووە "تاوانبارانی تیرۆركردنەكە باندێكی پێنج كەسین و لە چوار پیاو و ژنێك پێكهاتون".
هەر ئەوكات ناوەندی هاوكاریی حزبەكانی كوردستانی ئێران، كە پێكهاتبوون لە "حزبی دیموكراتی كوردستانی ئێران، حزبی دیموكراتی كوردستان، كۆمەڵەی شۆڕشگێڕی زەحمەتكێشانی كوردستانی ئێران، كۆمەڵەی زەحمەتكێشانی كوردستان، سازمانی خەباتی كوردستانی ئێران) لە راگەیەنراوێكی هاوبەشدا رایانگەیاند، دەزگای تیرۆری كۆماری ئیسلامی پێشینە و رابردویەكی پڕ دیاری لە تیرۆری كادر و پێشمەرگە و ئەندامانی حزبە كوردییەكانی ئۆپۆزیسیۆنی رژێمدا هەیە، هەر لە تیرۆرەكانی دەیەی 90ی زایینی دژبە هێزە سیاسییەكانی رۆژهەڵاتی كوردستان، كە سەدان تێكۆشەری كوردیان لێ ستاندین، هەم لە تیرۆری كەسایەتییە سیاسییەكانی دژبەری كۆماری ئیسلامی لە دەرەوەی وڵات، بە تایبەت تێكۆشەرانی كورد كە كۆماری ئیسلامیی ئێران و كاربەدەستانی هەرە سەرووی ئەو رژێمە لە پشتی ئەو تیرۆر و تاوان و جینایەتانە‌ن، كە رژێم لە دەرەوەی وڵات كردونی".
نزیكەی یەك مانگ دوای تیرۆركردنی فەرماندەكەی حدك و لە 12ی نیسانی 2018 پارتی ئازادی كوردستان "پاك" بڵاویكردەوە، لە شەقامی 120 مەتری شاری هەولێر لەلایەن دوو ماتۆڕسوارەوە ئۆتۆمبێلی حسێن یەزدانپەنا سەرۆكی ئەو حزبە كەوتوەتەبەر دەستڕێژی گوللـە و بەهۆیەوە بە سوكی برینداربووە. بەرپرسانی پارتی ئازادیش ئەو هەوڵی تیرۆركردنە دەخەنەئەستۆی هێزەكانی كۆماری ئیسلامی ئێران.


مەكینەی تیرۆركردنی چالاكوانانی رۆژهەڵات هەر بەوانەوە نەوەستا و ئەمجارەیان لە پێنجوێن، چالاكوانێكی تری كردە ئامانج، كە پێش چەند ساڵێك هەر لەو قەزایە لە هەوڵێكی تیرۆركردن رزگاری ببوو.
هەروەها رۆژی 18ی تەمموزی 2018 تەرمی ئیقبال مورادی ئەندامی بەڕێوەبەری كۆمەڵەی مافی مرۆڤی كوردستان و چالاكوانی نزیك لە پارتی ژیانی ئازادی كوردستان "پژاك" لە نزیك چەمێكی پێنجوێن دۆزرایەوە، كە شوێنەواری گوللـەی پێوەبوو.


ئیقبال مورادی پێش 10 ساڵ و هەر لە نزیك پێنجوێن هەوڵی تیرۆركردنی درابوو، كە بەهۆیەوە چەند گوللـەیەك بەر جەستەی كەوتبوو، بنەماڵەكەی و چالاكوانانی سیاسی و مەدەنی رۆژهەڵاتی كوردستان ئەو تاوانەش بە تیرۆر ناودەبەن و پەنجەی تۆمەتیش بۆ كۆماری ئیسلامی ئێران درێژدەكەن.


هێشتا دوو مانگ بەسەر تیرۆركردنی ئیقبال مورادیدا تێپەڕ نەبوو، كە زانیاری كوڕی و لوقمانی برازای لەگەڵ رامێن حسێن پەناهی زیندانییەكی دیكەی سیاسی رۆژهەڵاتی كوردستان لە گرتوخانەی رەجایی شەهری كەرەج لە سێدارەدان، هەمان رۆژ واتە لە 8ی ئەیلولدا هێزەكانی سوپای پاسدارانی ئێران بنكە و بارەگاكانی حزبی دیموكراتی كوردستانیان لە نزیك كۆیە موشەكباران كرد، بەهۆیەوە نزیكەی 50 سەركردە، ئەندام و پێشمەرگەی دیموكرات شەهید و برینداربوون.


سەرباری ئەو ژمارە زۆرەی قوربانی لە مانگی ئەیلولدا، دەفتەری ئەو مانگە دانەخرابوو، كە لە دەربەندیخان چالاكوانێكی دیكەی رۆژهەڵاتی كوردستان بە ناوی لوقمان شەهابی تەقەی لێكرا و بە سەختی برینداركرا.
رۆژی 25ی ئەیلول، كەسێك لە دەرگای ماڵی لوقمان شەهابی دەدات- كە ساڵانێكە بەهۆكاری سیاسی خۆی و بنەماڵەكەی لە رۆژهەڵاتەوە ئاوارەی باشوری كوردستان بوون- لەگەڵ كردنەوەی دەرگاكە تەقەی لێدەكات و دوو فیشەكی پێوەدەنێت.


گوللـەكان بەر سەری لوقمان كەوتون و تائێستاش لە ژێر چاودێری پزیشكیدایە و بە وتەی سامان شەهابی برای، گوللـەكان زیانیان بە بەشێكی مێشكی گەیاندوە و بۆتەهۆی لەدەستدانی یادگەی ماوە كورت و كێشەی بۆ قسەكردن و جوڵەی دەست و قاچی دروست كردووە، بۆ چارەسەریش ئێستا لە هیندستانە.
سامان شەهابی، كە قسەی بۆ نەوا كرد، ئاماژەی بەوەدا جۆری تاوانەكە، بەتایبەتی كە تێیدا چەكی بێدەنگ بەكارهاتووە و هەروەها كاتی رووداوەكە دوابەدوای زنجیرەیەك كردنە ئامانجی چالاكوانانی رۆژهەڵات بووە، هەر هەموویان ئاماژەن بەوەی ئەو تاوانەش ئەڵقەیەكە لەو زنجیرەیە كە ئامانجی ترساندن و تۆقاندنی چالاكوانانی رۆژهەڵاتە.
سەبارەت بە كەیسەكەش دەڵێت: وتەی سەرەتایی لە لوقمان وەرگیراوە و ناوێكیش دراوە، بەڵام بەهۆی ئەوەی یادگەی لەدەستداوە، تا ئێستا بەرەوپێشچوونێك بەدی نەكراوە و لە كامێراكانی چاودێریشەوە تەنها یەك دیمەن تۆماركراوە، ئەویش دووراودوورە، بۆیە كەیسەكە لای پۆلیس و دادگا بە كراوەیی ماوەتەوە، بەڵام بە خاوی بەرەوپێشدەچێت. 
جیا لەوەی لە سەرجەم حاڵەتەكانی كردنە ئامانجی رۆژهەڵات لە باشور پەنجەی تۆمەت بۆ هێزە ئەمنیەكانی ئێران رادەكێشرێت، خاڵێكی تری هاوبەش بریتییە لەوەی لە زۆربەی حاڵەتەكاندا دۆسیەكان ناگەنە ئەنجام و بكوژان بێ سزا قوتاریان دەبێت.
زیادبوونی حاڵەتەكانی هێرش و تیرۆركردنی چالاكوانانی رۆژهەڵات لە ساڵی 2018دا هەمان ئەو رووداوانە لە نەوەدەكانی سەدەی رابردوو بە بیردێنێتەوە، كە تێیاندا وەك حزبەكانی ئەو بەشەی كوردستان باسی لێدەكەن نزیكەی 350 ئەندامیان لە باشور بە رێگەی جیاجیا لەوانە تەقەكردن، تەقینەوە و دەرمانخواردكردن، تیرۆركران.
ئاخۆ هێرش و كردنە ئامانجی چالاكوانانی رۆژهەڵات لە باشوری كوردستان هاوشێوەی نەوەدەكانی سەدەی رابردوو ژمارەیەكی زۆر چالاكوان دەكاتە قوربانی، یان بە راكێشانی سەرنجی رای گشتی نێودەوڵەتی بۆسەر ئەو كەیسانە و چڕكردنەوەی فشارەكان دەتوانرێت سنورێكی بۆ دابنرێت؟ تا چەند دەستگیرنەكردن و دەربازبوونی ئەنجامدەرانی ئەو تاوانانە رێگەخۆشكەرە لە دوبارەبونەوەی ئەو روداوانە؟

شەپۆلەکانی نەوا

Copyright © 2017 - Radio Nawa. Designed and Developed by Avesta Group