نەوا
ئاسایشی سلێمانی كەسێكی دەستگیركرد كە بە نیازبوو،  13 تۆن برنجی بایەعی بە ناوی چەند ماركەیەك و بەنرخی گرانتر لە بازاڕدا ساغبكاتەوە.
لە راگەیەندراوێكدا ئاسایشی سلێمانی باسی لەوەكردووە،" لە درێژەی كارو چالاكیەكانی بەڕێوەبەرایەتی ئاسایشی پارێزگای سلێمانی، بەمەبەستی نەهێشتن و بنبڕكردنی هەمو جۆرە مەوادێكی ساختە،  هێزەكانمان توانیان كەسێك دەستگیربكەن بەناوی (ع،ف،ع) لە گەڕەكی قولەرەیسی شاری سلێمانی كە بڕی (13) تۆن برنجی بایەعی لە كۆگاكەیدا عەمبار كردبوو".
بەگوێرەی راگەیەندراوەكە،"دەستگیركراوەكە بە نیازبوە برنجی بایەعیەكە بكاتە كیسی 25 كیلۆگرامی بەتاڵ لە جۆری  (قبلە و فاخر و تایلاند)ەوە لە بازاڕ بەگرانتر ساغیان بكاتەوە و بیانفرۆشێت بە هاوڵاتیان".
ئاسایش باسی لەوەشكردووە،"پێشئەوەی  بیانخاتە بازاڕەوەو ساغیانبكاتەوە، دەستگیرا بەسەر برنجەكەداو ناوبراو ڕوبەڕوی لایەنی پەیوەندیدار كرایەوە بەمەبەستی ڕێكاری یاسایی".