نەوا
دانا عەبدولكەریم وەزیری ئاوەدانكردنەوە و نیشتەجێكردنی هەرێم رایگەیاند، تا رۆژی 15ی ئەم مانگە ئەمساڵ كاری نۆژەنكردنەوەی هەموو رێگاوبانەكان تەواو دەبێت.
ئەو وەزیرەی حكومەتی هەرێم رایگەیاندوە، رێگاوبان شادەماری بازرگانی و گەشەسەندنی ئاڵوگۆڕی بازرگانی و ئابوری وڵات و بەستنەوەی هەرێمی كوردستانە بە وڵاتانی دراوسێ و وڵاتانی دیكەوە، بۆیە ئەولەویەتی كارەكان تەواوكردنی رێگاوبانەكانە.
دانا عەبدولكەریم لە دیمانەیەكی رۆژنامەی "خەبات"دا وتویەتی "لەچوارچێوەی كارو بەرنامەو پلانی چوار ساڵی داهاتوی وەزارەتی ئاوەدانكردنەوەو نیشتەجێكردن گرنگیدانە بە هەردوو كەرتی ئاوەدانكردنەوەو نیشتەجێكردن و تەواوكردنی رێگا جووت سایدەكانی نێوان شارەكانی كوردستان و ئەو رێگایانەی لەماوەی چوار ساڵی داهاتودا و دوای تەرخانكردنی بودجەی پێویست، دەبێت تەواو بكرێن".
وتیشی "لەئێستادا زیاتر 90%ی پڕۆژەی چاككردنەوەی رێگاوبانەكان تەواوبوە و تا رۆژی 15ی ئەم مانگە پێویستە كاری نۆژەنكردنەوەی هەموو رێگاوبانەكان تەواو ببێت".