ئه‌بوبه‌كر كاروانی: روخانی عیراق له‌ ساڵی 2006وه‌ ده‌ستیپێكرد

12/02/2020

نه‌وا-سه‌عید عه‌بدوڵڵا-هه‌ولێر
به‌مه‌به‌ستی قسه‌كردن له‌سه‌ر بارودۆخی سیاسی و ئابوریی عیراق و كاریگه‌ریه‌كانی له‌سه‌ر هه‌رێمی كوردستان، پانێڵێك له‌ هه‌ولێر به‌ڕێوه‌چو.
پانێڵه‌كه‌ ئه‌مڕۆ 12-2-2020 له‌ زانكۆی لوبنانی-فه‌ره‌نسی له‌ هه‌ولێر رێكخراو تێیدا هه‌ریه‌ك له‌ مه‌حمود محه‌مه‌د ئه‌ندامی مه‌كته‌بی سیاسیی پارتی دیموكراتی كوردستان و مه‌لا به‌ختیار ئه‌ندامی ئه‌نجومه‌نی باڵای سیاسی و به‌رژه‌وه‌ندی یه‌كێتیی نیشتمانیی كوردستان و ئه‌بوبه‌كر كاروانی رۆشنبیر و توێژه‌ری ئیسلامی سیاسی بابه‌تیان پێشكه‌شكرد.
سه‌ره‌تا مه‌لا به‌ختیار له‌ قسه‌كانیدا وتى "ئه‌وكاته‌ی پادشایه‌تی هه‌بوو، عیراق ئاوه‌دانتر و هه‌وڵی گه‌شه‌سه‌ندنی زیاتر بوه‌، به‌ڵام ئه‌وكاته‌ى كورد خه‌باتی بۆ رزگاری خۆی ده‌كرد وه‌ك تێكده‌ر ناسراوه‌ و به‌ یاخی له‌ قه‌ڵه‌م ده‌درا، به‌ڵام هه‌رێمی كوردستان به‌وپه‌ڕی ئاوه‌دانی و گه‌شه‌كردنه‌وه‌ بنیادنراوه‌، له‌گه‌ڵ ئه‌وه‌شدا عه‌قڵی تایفه‌گه‌ری له‌ عیراقدا به‌غدا و به‌سڕه‌ی خاوه‌ن شارستانیه‌تی وێرانكرد".
وتیشى "له‌دوای روخانی به‌عس، باس له‌وه‌ ده‌كرێت 600 ملیار دۆلاری به‌تاڵان براوه‌ و ئێستا هیچ سێكته‌رێك نییه‌ گه‌نده‌ڵی و داڕمانی تێ نه‌كه‌وتبێت، كورد به‌ هاوسه‌نگی هێزی سه‌ربازی و ئیداری خۆی له‌ عیراقدا هێشتۆته‌وه‌، بۆیه‌ كاتێك پارسه‌نگی هێز له‌ عیراق بێت شه‌ڕ به‌ هه‌رێمی كوردستان ده‌فرۆشێت".
لاى خۆیشیه‌وه‌ مه‌حمود محه‌مه‌د له‌ پانێڵه‌كه‌دا وتی "قه‌یران له‌ عیراقدا چاره‌سه‌رناكرێت، به‌ڵكو ئیداره‌ ده‌درێت ئه‌وه‌ش گرفتی گه‌وره‌ی بۆ هه‌موو عیراق هێناوه‌ته‌ئاراوه‌، هه‌روه‌ك توندوتیژی بۆته‌ كلتوور له‌ناو خه‌ڵك و سه‌ركرده‌و حزبه‌ سیاسییه‌كانیشدا، ئه‌مه‌ له‌كاتێكدایه‌ هه‌م ئه‌مریكا و هه‌م ئێران و وڵاتانی دیكه‌ش له‌ عیراقدا هه‌ن و ئه‌وانه‌ش پاشخانیان له‌گه‌ڵ یه‌ك هه‌یه‌ له‌ توندوتیژی، ئه‌وه‌ش هۆكاره‌كه‌ی ئه‌وه‌یه‌ 99 ساڵ پێش ئێستا ئه‌و ده‌وڵه‌ته‌ی كه‌ ناوی عیراقه‌، به‌ سه‌قه‌تی دروستكراوه‌و ئه‌وه‌ش بۆ ئه‌وه‌بو هه‌ندێك خه‌ڵك ڕازی بكه‌ن، هه‌میش به‌رژه‌وه‌ندیه‌كانیان بپارێزن". 
له‌به‌شێكی دیكه‌ی قسه‌كانیدا مه‌حمود محه‌مه‌د باسی له‌وه‌كرد، په‌یوه‌ندییه‌كانی عیراق له‌سه‌رئاستی دراوسێ و نێوده‌وڵه‌تی جیاوازه‌، ئه‌وه‌تا دراوسێكانی ده‌ست له‌كاروباری عیراق وه‌رده‌ده‌ن و له‌سه‌رئاستی نێوده‌وڵه‌تیش وه‌ك پێویست جێگه‌ی نابێته‌وه‌، له‌لایه‌كی دیكه‌ه‌وه‌ ناوخۆی عیراق كێشه‌ی هه‌یه‌ به‌تایبه‌تی شیعه‌كان، كه‌ ئێستا خۆیان یه‌كلایی نه‌كردۆته‌وه‌، ناوه‌ندی بڕیار قوم-ه‌ یان نه‌جه‌ف، له‌ سه‌روو هه‌موو ئه‌وانه‌ش هه‌میشه‌ له‌گه‌ڵ سوننه‌و كورد له‌ كێشه‌دابون، بۆیه‌ هه‌ڵاوسانی كێشه‌ و قه‌یرانه‌كان هاته‌كایه‌وه‌.
له‌باره‌ی سوننه‌كانیشه‌وه‌ وتی "به‌هۆی هه‌ڵه‌ تێگه‌یشتن له‌ سیستمی عیراق، كه‌ پێیانوایه‌ هه‌ر ده‌بێت سوننه‌ حوكمڕان بن، به‌شداری كارای هیچ پرۆسه‌یه‌كی سیاسییان له‌ عیراقدا نه‌كردوه‌، هه‌رچی كوردیشه‌ زۆر كێشه‌ی هه‌بوه‌ كه‌ نه‌مانتوانیوه‌ وه‌ك پێویست پێناسه‌ی حوكم بكه‌ین و قه‌یرانه‌ ناوخۆییه‌كان چاره‌سه‌ربكه‌ین، بۆیه‌ پێویسته‌ خۆمان ئاماده‌ی قۆناغه‌كانی داهاتوو بكه‌ین، چونكه‌ ئێمه‌ ترسمان هه‌م له‌ رابردوو هه‌بوه‌ هه‌م له‌ عیراقی دوای سه‌دام و هه‌میش ترسی سه‌رده‌می داهاتومان ده‌بێت، بۆیه‌ پێویسته‌ له‌ عیراقدا كێشه‌كان چاره‌سه‌ربكه‌ین و په‌یوه‌ندییه‌كانمان هه‌ڵچنینه‌وه‌".
له‌لایه‌كى دیكه‌وه‌ ئه‌بوبه‌كر كاروانی له‌ پانێڵه‌كه‌دا باسی له‌وه‌كرد، هێشتا له‌ عیراقدا زه‌وییه‌ك نییه‌، كه‌ ببێت به‌ ده‌وڵه‌ت دوای ئه‌و روداوانه‌ی رویاندا چ به‌ر له‌ سه‌دام و دواتریش هیچ به‌رنامه‌یه‌كیان نییه‌ بۆ دروستكردنی ده‌وڵه‌ت، له‌ عیراق و كوردستانیش به‌چاوی ده‌ستكه‌وت سه‌یری ده‌سه‌ڵات ده‌كرێت تا بگه‌ینه‌ ده‌سه‌ڵات بۆ خۆده‌وڵه‌مه‌ندكردن و ناوبانگ.
وتیشى "بڕیاربوو له‌ساڵی 2003وه‌ دیكتاتۆریه‌ت له‌ عیراقدا كۆتایی پێبێت، به‌ڵام روخانی عیراق له‌ ساڵی 2006وه‌ ده‌ستیپێكرد كه‌ شه‌ڕی ناوخۆ دروستبو، هه‌روه‌ها ده‌یان گروپ و ده‌سته‌ش دروست بون، كه‌ به‌شێكیان تیرۆریست بون، بڕینی بودجه‌ی هه‌رێمیش یه‌كێك له‌ پایه‌ هه‌ره‌ گرنگه‌كانی عیراقی روخاند، بۆیه‌ هیچ كاتێك دیموكراسی له‌چوارچێوه‌یه‌كی فشه‌ڵدا دروستنابێت، كێشه‌ی ئێمه‌ش له‌ هه‌رێمی كوردستان ئه‌وه‌یه‌، كه‌ ده‌سه‌ڵاتی به‌هێزمان نییه‌".
كاروانی دوپاتیكرده‌وه‌، ئه‌وه‌ی ئێستا هه‌یه‌ به‌شێكه‌ له‌ قه‌یرانی سیاسی كه‌ توانای چاره‌سه‌ری كێشه‌كانی نییه‌ و تائێستاش جێگره‌وه‌ی نییه‌، هه‌روه‌ها ئابوریه‌كی داڕوخاوی هه‌یه‌ و هه‌ژموونی وڵاتانی دراوسێ و نه‌بونی هیچ هه‌ماهه‌نگییه‌ك له‌نێوان پێكهاته‌كاندا بونی هه‌یه‌، به‌ڵام ئێستا بزوتنه‌وه‌یه‌كی ناڕه‌زایه‌تی و نیمچه‌ شۆڕشێك هه‌یه‌و داوای رۆیشتنی ده‌سته‌بژێری حوكمڕانی ده‌كات و به‌كورتیش داوای گه‌ڕانه‌وه‌ بۆ دوای 2003 ده‌كات و داوای تێپه‌ڕاندنی بنه‌ما ئایینی و مه‌زهه‌بییه‌كان ده‌كات، ده‌بێ یارییه‌كی ژیرانه‌ له‌گه‌ڵ روداوه‌كاندا بكرێت، چونكه‌ ئێستا له‌ كوردستان یه‌ك ده‌نگی و یه‌ك هه‌ڵوێستی بونی نییه‌، بۆیه‌ به‌رگه‌ی هیچ فشارێكی نێوده‌وڵه‌تی ناگرێت".


شەپۆلەکانی نەوا

Copyright © 2017 - Radio Nawa. Designed and Developed by Avesta Group