سوننه‌كان: شه‌ش وه‌زاره‌تی كابینه‌ی نوێی عیراقمان به‌رده‌كه‌وێت

21/10/2018 عێراق

نه‌وا
فالح عیساوى په‌رله‌مانتارى فراكسیۆنی میحوه‌رى وه‌ته‌نى (سوننه‌كان) ده‌ڵێت "ده‌ستكه‌وتى هه‌ڵبژاردنى فراكسیۆنه‌كه‌مان شه‌ش وه‌زاره‌ته‌، كه‌ دووانیان سیادین".
عیساوى له‌لێدوانێكى رۆژنامه‌وانیدا وتى "گفتوگۆكان له‌گه‌ڵ عادل عه‌بدولمه‌هدى سه‌رۆك وه‌زیرانى راسپێردراو به‌رده‌وامه‌ و گه‌یشتۆته‌ قۆناغێكى پێشكه‌وتو".
وتیشى "پشكى پێكهاته‌ى سوننه‌، كه‌ میحوه‌رى وه‌ته‌نى نوێنه‌رایه‌تى ده‌كات، شه‌ش وه‌زاره‌ته‌ و دووانیان سیادین و 4یان خزمه‌تگوزارین، ئه‌وه‌ش سه‌ره‌ڕاى دوو وه‌زاره‌تى دیكه‌، كه‌ له‌ئێستادا گفتوگۆیان له‌سه‌ر ده‌كرێت".
ئه‌و په‌رله‌مانتاره‌ رونیكردۆته‌وه‌، ئه‌و وه‌زاره‌تانه‌ش كه‌ ده‌درێت به‌ فراكسیۆنه‌كه‌یان، له‌كاتى دابه‌شكردنیدا حزبه‌كان و پارێزگاكان له‌به‌رچاو ده‌گیرێن.
ئه‌و جه‌ختكردنه‌وه‌یه‌ له‌كاتێكدایه‌، هه‌ندێك فراكسیۆن له‌وانه‌ش ئیئتیلافى سائیرون، كه‌ براوه‌ى یه‌كه‌می هه‌ڵبژاردنه‌كانه‌ داوا ده‌كات حكومه‌تێكى ته‌كنۆكرات پێكبهێنرێت و پۆسته‌كان بدرێن به‌ كه‌سانى سه‌ربه‌خۆ و ده‌ستپاك و حكومه‌تى داهاتوو به‌دووربێت له‌ دابه‌شكارى.


شەپۆلەکانی نەوا

Copyright © 2017 - Radio Nawa. Designed and Developed by Avesta Group