به‌لجیكا.. سزای 20 ساڵ زیندان به‌سه‌ر دیپلۆماتێكی ئێرانی په‌سه‌ندكرا

05/05/2021 جیهان

نه‌وا
دادگای پێداچوونه‌وه‌ی ئانتۆرپی به‌لجیكا سه‌پاندنی سزای 20 ساڵ زیندان به‌سه‌ر دیپلۆماتێكی ئێرانیدا په‌سه‌ند كرد، كه‌ تۆمه‌تباره‌ به‌وه‌ی له‌ ساڵی 2018دا پلانی بۆ ئه‌نجامدانی ته‌قینه‌وه‌ له‌ گردبوونه‌وه‌یه‌كی رێكخراوی موجاهیدینی خه‌لق له‌ پارێس داناوه‌.
ئه‌سه‌دوڵا ئه‌سه‌دی سكرتێری سێهه‌می باڵیۆزخانه‌ی ئێران له‌ ڤییه‌ننا كه‌ ساڵی 2018 له‌ ئاڵمانیا ده‌ستگیركرابوو، دوای چه‌ند دانیشتنێكی دادگا سزای 20 ساڵ زیندانی به‌سه‌ردا سه‌پێنرابوو، به‌ بێ ئه‌وه‌ی خۆی ئاماده‌ی دانیشتنه‌كانی دادگا بێت.
له‌ دانیشتنی دادگای پێداچوونه‌وه‌شدا ئه‌و دیپلۆماته‌ ئێرانیه‌ به‌شداری له‌ دانیشتنه‌كه‌دا نه‌كردبوو، هاوكات به‌ وته‌ی پارێزه‌ره‌كه‌ی به‌ هۆی ئه‌وه‌ی بریگرته‌كه‌ی پارێزبه‌ندی دیپلۆماسی هه‌یه‌ له‌ بنه‌ڕه‌ته‌وه‌ دان به‌ دادگاكه‌دا نانێت و داوای پێداچوونه‌وه‌شی نه‌كردووه‌.
ئه‌مه‌ جاری یه‌كه‌مه‌ كه‌ دیپلۆماتێكی ئێران له‌ ئه‌وروپا به‌ تۆمه‌تی تێوه‌گلان له‌ تیرۆر سزای زیندانی به‌سه‌ردا بسه‌پێنرێت.
باڵیۆزخانه‌ی ئێران له‌ بروكسه‌ل جارێكی تر جه‌ختی له‌وه‌كردوه‌ته‌وه‌، كه‌ ئه‌و دیپلۆماته‌یان پارێزبه‌ندی هه‌یه‌ و دادگایی كردنه‌كه‌ی پێچه‌وانه‌ی یاسا نێوده‌وڵه‌تیه‌كانه‌.

شەپۆلەکانی نەوا

Copyright © 2017 - Radio Nawa. Designed and Developed by Avesta Group