شەشەمین فلمەڤیستەڤالا دهوك یا نیڤ دەولەتی دەست پێكر

20/10/2018 هەمەڕەنگ

نەوا - ئارام حسێن - دهۆك 
ئێڤاریا روژا شەمبی 20-10-2018 شەشەمین فلمە ڤیستەڤالا دهوك یا نیڤ دەولەتی ب نمایشكرنا فلمێ (زاگروس) دەست بكارێن خو كر و بریارە تا 27-10-2018 یا بەردەوام بیت.
دداخویانیەكێ دا بو رادیویا نەوا شەوكەت ئەمین بەرپرسێ تەكنیكی یێ شەشەمین فلمە ڤیستەڤالا دهوك یا نیڤ دەولەتی راگەهاند كو د ڤیستەڤالێ 105 فلم د بەشدارن كو ژوان 40 فلم یێن بەشێ كوردی نە و 65 فلم یێن بەشێن دی یێن ڤیستەڤالێ نە و ئەڤ سالە تەكەز یا لسەر سینەمایا وەلاتێ ئەرمینیا هاتیە كرن و فلمێن نویی و كلاسیك یێن هاتینە بەرهەڤكرن بو بینەران.


شەوكەت ئەمین ی دیاركر ژی كو د ڤیستەڤالێ دا دێ خەلات هێنە پێش كێش كرن  بو باشترین فلمێ درێژ و باشترین كورتە فلم و باشترین دیكیومێنت هەروەسان خەلاتەك هاتیە زێدەكرن كو ئەو ژی دێ ژوریەكا تایبەت ب رەخنەگران ڤە هێتە بەرهەڤكرن و ئەڤ چەندە ب سەرپەرشتیا  5 ژوری یێن ڤیستەڤالێ دێ هێتە ئەنجام دان  كو دێ هەلسەنگاندنا فلمان كەن.
بەرپرسێ تەكنیكی یێ فلمە ڤیستەڤالا دهوك یا نیڤ دەولەتی گوت ژی كو 7 خەلات هاتینە بەرهەڤكرن ب رەنگەكی كو بهاترینێ وان خەلاتێ یەلماز گونایی یە دێ هێتە پێش كێش كرن بو باشترین فلمێ بەشێ بیانی هەروەسان خەلاتێ ژوریا بیانی دگەل 5 خەلات بو بەشێ نافخویی.
د رێورەسمان دا بەرپرسێن حكومی و پەیوەندیدار بەرهەڤبون و سەفین دزەیی ئاخفتنكەرێ حكومەتا هەرێما كوردستانێ ب نوینەرایەتیا سەروكێ حكومەتێ پەیڤەك پێش كێش كر و پشتەڤانیا حكومەتێ بو ڤیستەڤالێ راگەهاند و ئاشكراكر كو سەرەرای هەمی قەیرانان لێ ل سالێن بوری حكومەتێ تێچویێن ڤیستەڤالێ دابین دكرن و ل سالێن بهێت ژی دێ یا بەردەوام بیت ژبەركو ڤیستەڤالا دهوك بویە دەرگەهێ دانەنیاسیانا هەرێما كوردستانێ ب شێوەكێ جوان بو جیهانێ.


ژلایێ خوڤە پارێزگارێ دهوك فەرهاد ئەمین كو دهەمان دەمدا سەروكێ فلمەڤیستەڤالا دهوك یا نیڤ دەولەتی یە راگەهاند كو ئەنجام دانا ڤیستەڤالێ د بارودوخێن سەختدا نیشانێن خو راگری و شیانێن سەرپەرشتێن ڤیستەڤالێ بون و ب هەمی رەنگان دێ كاركەن بو وێ چەندێ ڤیستەڤال بەرەڤ قوناغێن گەلەك باش ڤە بچیت و ل سالێن داهاتی دا دێ هەول دەن كو بودجەیەكا تایبەت و شایستە بو ڤیستەڤالێ ژ داهاتێ دهوكێ دابین بكەن بو وێ چەندێ ل دەمێ هاتنە پێشا هەر بارودوخەكی ئاستەنگ دروست نەبن و كار ب ئاسایی ب رێڤە بچن.
پارێزگارێ دهوكێ دیار كر ژی كو ئەڤە دوو گەرن ڤیستەڤال ل دەمێ خودا ناهێنە ئەنجام دان ب ئەگەرێن وێ چەندێ كو ل سالا بوری ریفراندوم ل وی دەمی هاتبو ئەنجام دان و د ئەڤ سالە ژی دا هەلبژارتن بو نە ئەگەرێ پاشئێخستنا دەمێ وێ لێ ل سالێن بهێت دێ ددەمێ خو یێ ئاسایی دا هێتە ئەنجام دان.

شەپۆلەکانی نەوا

Copyright © 2017 - Radio Nawa. Designed and Developed by Avesta Group