وەزارەتی گواستنەوەی عێراق بڕیاریدا بە كەمكردنەوەی نرخی بلیتی فڕۆكە بە ڕێژەی 90% بۆ توشبوانی شێرپەنجە و هەر نەخۆشێك دەتوانێت لە ساڵێكدا دووجار لەو داشكاندنە سودمەند بێت.
كۆمپانیای گشتی هێڵی ئاسمانی عێراقی رایگەیاند، وەك جێبەجێكردنی داواكارییەكی وەزیری گواستنەوەی عێراق، بڕیاریانداوە بە ڕێژەی 90% نرخی بلیتی فڕۆكە بۆ ئەو كەسانە دابەزێنن كە نەخۆشی شێرپەنجەیان هەیە.
عەباس ناسر بەڕێوەبەری گشتی كۆمپانیاكە رایگەیاند، ئەمانجی بڕیارەكە ئاسانكردنی ئەركی سەرشانی نەخۆشەكان و پێشكەشكردنی ئاسانترین و باشترین خزمەتگوزارییە پێیان.
رونیشیكردەوە، لەساڵێكدا دوو جار ئەم هەلە دەدرێت بە توشبوانی شێرپەنجە.
بەڕێوبەری كۆمپانیای گشتی هێڵی ئاسمانی عێراقی ئاماژەی بەوەش كرد، دۆسیەی تایبەت لە بەشی بازاڕكردنی كۆمپانیاكە كراوەتەوە بۆ نەخۆشەكان و سەرجەم ئەو بەڵگەنامانەش هەڵدەگیرێن و دەپارێزرێن كە تایبەتن بە راپۆرتی پزیشكیی نەخۆشەكان.