چیرۆكی دۆزینەوەی سەربازێكی كوژراوی بەریتانیا لە عیراق

پێش 2 هەفتە هەمەڕەنگ

نەوا
رۆژنامەی ئیندیپێندێنتی بەریتانی چیرۆكی دۆزینەوەی روفاتی سەربازێكی بەریتانی لە عیراق بڵاودەكاتەوە، كە لەسەردەمی جەنگی جیهانیی یەكەمدا كوژراوە و كچەزای سەربازەكەش دەڵێت "توركەكان كوشتویانە".
لە وتارێكدا، كە رۆبێرت فیسك لە رۆژنامەكەدا بڵاویكردوەتەوە، نوسیویەتی "نامەیەكم لە خانمێكی ئینگلیزیەوە پێگەیشت، كە داوای كردبوو بچم بۆ سەیری گۆڕێكی بەكۆمەڵی سەربازانی كوژراوی بەریتانی لە جەنگی جیهانیی یەكەمدا لەشاری عەممارەی عیراق".
باسی لەوەشكردوە، نامەكە لە خانمێكەوە پێگەیشتوە، كە ناوی مۆیرا جینینجز بوو تەمەنی 87 ساڵ بووە ئەوكاتەی لەساڵی 2003دا عیراق داگیركراو دواتریش چەند نامەیەكی دیكەیان ئاڵوگۆڕكردوەن، ئەو خانمە باسی لەوەكردبوو نەنكی چەندینجار باسی كوشتنی هاوسەرەكەی كردووە لە جەنگی جیهانیی یەكەمدا كە ئاژەڵداری كردووە لە سكۆتلەندا و دواتر بووەتە سەرباز، ئەو ژنە ئاماژەی بەوەداوە نەنكی پێی وتووە "دوای ئەوەی لەلایەن توركەكانەوە هاوسەرەكەی و سەربازانی دیكەی بەریتانی كوژران، لەوڵاتی نێوان دوو روبارەكەدا نێژراون".
ئەو نوسەرە لەوتارەكەیدا روداوەكانی ئەو سەردەمە روندەكاتەوەو باسی لەوەكردوە، بەدرێژایی روباری دیجلە جەنگ هەڵگیرسابوو، لۆرانسی عەرەب (كە سەربازێكی بەریتانی بوو لەكاتی شۆڕشی عەرەب دژی دەوڵەتی عوسمانی هاوكاری عەرەبەكانی كرد) لەگەڵ چەندین كەسی دیكە لەهەوڵی ئەوەدابوون بەرتیل بدەن بە توركەكان بۆ ئەوەی رێگە بۆ ئەو كەتیبەیەی بەریتانیا بكەنەوە كە گەمارۆدرابون، سەربازەكان ناچاربون ئەسپەكانیان سەربڕن و بیانخۆن بۆئەوەی لەژیاندا بمێنن، بەڵام نەخۆشی كۆلێرا بەشێوەیەكی وێرانكەر لەنێویاندا بڵاوبوەوە.
رونیشكراوەتەوە، دوای ئەوەی لەكۆتاییدا كەتیبەكە خۆی دایە دەستی توركەكان، 4 هەزار سەرباز گیانیان لەدەستدابوو، لە عەممارەی باشوری عیراق لەناوچەیەكدا نێژران، كە بەسەر رووباری دیجلەدا دەیڕوانی، ئەو شەڕەش بە خراپترین شكستی هاوپەیمانان لە جەنگی جیهانیی یەكەمدا دادەنرێت.


شەپۆلەکانی نەوا

Copyright © 2017 - Radio Nawa. Designed and Developed by Avesta Group