نەوا
نێچیرڤان بارزانی سەرۆكی هەرێمی كوردستان پێشوازی لە دەستەی سەرۆكایەتیی پەرلەمانی كوردستان كرد.
ماڵپەڕی سەرۆكایەتی هەرێمی كوردستان بڵاویكردەوە، رۆژی یەكشەممە دەستەی سەرۆكایەتیی پەرلەمانی كوردستان سەردانی نێچیرڤان بارزانی سەرۆكی هەرێمی كوردستان-یان كرد و لە كۆبوونەوەیەكدا گفتوگۆكرا لەبارەی كاری پەرلەمانی و گرنگیدان بەو یاسایانەی پێگەی دەستووریی هەرێمی كوردستان بەهێز دەكەن.
ئاماژەی بەوەیش داوە، كە لەبارەی پەیویەندییەكانی هەولێر-بەغدا و پاراستنی مافە دەستوورییەكانی هەرێمی كوردستان، هەماهەنگیی نێوان پەرلەمانی كوردستان و فراكسیۆنە كوردستانییەكان لە ئەنجوومەنی نوێنەرانی عێراق و گرنگیی هەماهەنگیی نێوان فراكسیۆنە كوردستانییەكان لە بەغدا، بەردەوامیی پرۆسەی چاكسازی و سەقامگیری و بەرەوپێشچوونی پرۆسەی سیاسی لە هەرێمی كوردستان تاوتوێ كراوە.