نەوا
هەرچەندە بڕیاربوو رۆژی یەكشەممە لە دژی كەمی پشكی كورد لە دامەزراندن خۆپیشاندان لە كەركوك بەڕێوەبچێت، بەڵام وەك باس دەكرێت لەسەر بنەمای بەڵێنی سەرۆك كۆمار و سەرۆك وەزیران بۆ چەند رۆژێك ئەو خۆپیشاندانە دواخراوە.
رۆژی شەممە لە كۆبوونەوەی لایەنە كوردستانیەكانی كەركوكدا بڕیاردرا رۆژی یەكشەممە لەبەردەم پەروەردەی شارەكە دژی كەمی پشكی كورد لە دامەزراندنی پەروەردەدا خۆپیشاندان بكرێت.
دواتر حەسیبە عەبدوڵا سەرۆكی لقی كەركوكی یەكێتیی مامۆستایانی كوردستان و ئەندامی ئەنجومەنی گشتی سەركردایەتیی یەكێتیی نیشتیمانیی كوردستان، رایگەیاند، "ئاگاداركراینەوە كە هەریەك لە سەرۆك كۆماری عیراق و سەرۆك وەزیرانی كاربەڕیكەر، بۆ پرسی دامەزراندنەكەی كەركوك هاتونەتە سەر خەت و بەڵێنی چارەسەركردنی كێشەكانیانداوە، بۆیە خۆپیشاندانەكەیان بۆ چەند رۆژێك دواخستووە.
وتیشی، كە خۆپیشاندانەكە بۆ ئەو مەبەستە دواخراوە كە كێشەكانیان بەڕێگەی تر چارەسەر بكرێت و وتی "ئەگەر بێت و چارەسەری كێشەكە نەكرێت، ئەوا خۆپیشاندان ئەنجام دەدەین و سەرجەم ئامادەكارییەكانیش تەواو بووە".
هاوكات ئەنجومەنی مامۆستایانی دانەمەزراویش رایانگەیاند، تا سێ رۆژ چاوەڕێی جێبەجێ كردنی ئەو بەڵێنانە دەكەن كە پێیاندراوە و لەئەگەری جێبەجێ نەكردنی داواكاریەكانیان دەست بە خۆپیشاندان و گرتنەبەری هەموو رێكارێكی مەدەنی دەكەن.
لە كۆی نزیكیە دوو هەزار و 500 پلەی دامەزراندنی پەروەردەی كەركوك زیاتر لە هەزار و 500 پلەی بەر پێكهاتەی عەرەب كەوتووە و ئەوەش ناڕەزایەتی كورد و توركمانی لێكەوتوەتەوە.