ئەمڕۆ شانۆیەكی سیاسی دەگمەن لە باشوری كوردستان و بە دیقەت لە سنوری سورداشی پارێزگای سلێمانی بەرێوەچوو. بزوتنەوەی چەكداری لە باكوری كوردستان كە نزیكەی ٤٧ ساڵ لەمەوبەر دەستی پێ كرد و لەو مێژووە دوور و درێژەدا بەهەزاران مرۆڤ گیانیان بەخشی ، گەریلا دەستەواژەیەكە كە بۆ شەرڤانانی ئەو بزوتنەوەیە بەكاردێت ، كە دەكرێت بەچەند خەسڵەتێكی بابەتی و شێوەیی بناسرێنەوەو لەهەر چەكدارێكی تر جیا بكرێنەوە. ئەمڕۆ ئەوەی كە بینیمان لە رێورەسمێكی پرۆتۆكۆلی و جیاوازدا كە ئەشكەوتی جاسەنەی شارۆچكەی سورداش كرابوو بە گۆرەپانی شانۆكە، (٣٠) گەریلای تێكەڵ لەهەردوو رەگەز ( نێر ، مێ) لە نێو ئەشكەوتەكەوە هاتنە گۆرەپانێك لە بەردەم نوێنەرانی توركیا، عێراق، هەرێمی كوردستان و دەم پارتی و لایەنی تری نێو دەوڵەتی چەكەكانیان دانا و دواتر لەلایەن سەركردەكانی خۆیانەوە ئاگریان تێبەردرا و سوتێندران، پاش خوێندنەوی وتارێك لەلایەن گریلاكانەوە كە باسی لە پرۆسەی ئاشتی و دیموكراتیزەكردنی توركیا ئەكرد مەراسیمەكە بە گەرانەوەی گەریلاكان بۆ نێو ئەشكەوتەكە بە كۆتا هات. ئەگەر لە رووی سۆزداریەوە سەیری رووداوەكە بكرێت دەبینیت گەریلایەك (٤٧) ساڵە لە نێو شاخ و ئەشكەوتەكانەوە لەرێگای خەباتی چەكدارەوە بۆ ئامانجێك تێكۆشان ئەكات ، ئەمرۆ ئەو گەریلایە چەكەكەی ئەسوتێنێت و چیتر لە رێگای تێكۆشانی چەكدارەوە بەرگری ناكات ، یاخود كۆتایی بەبزوتنەوەیەكی چەكدار دێت كە نزیكەی نیو سەدە رۆڵەی كورد بە گیانی خۆی بڵێسەی بە گری ئاگرەكەیداوە. بەڵام ئەگەر خوێندنەوەی سیاسی بۆ رووداوەكە بكەین ئەبینین ئەمرۆ كورد گەیشتووە بە ئامانجی سەرەكی بزوتنەوە چەكداریەكەی لە باكور ئەویش سەلماندنی بوونی خۆیەتی لەسەر خاكەكەی. ئەگەر بمانەوێت بابەتی بین ئەبێت بگەرێینەوە بۆ ئەو رۆژگارەی كە بزوتنەوەی چەكداری لە باكور هاتە گۆرەپانی تێكۆشان ، لەو رۆژگارەدا توركیا نكۆڵی لەبوونی هەر نەتەوەیەكی غەیرە تورك ئەكرد و دستوری توركیا پێناسەی دەوڵەتەكەی بە دەوڵەتێكی تاك نەتەوە ئەكرد و هەر جۆرە جیاوازبوونێكی یاساخ ئەكرد و سزای لەسێدارەدان و بەندكردنی هەتاهەتایی بۆ ئەوانە دیاری كردبوو كە پێناسەی جوداخوازیی ئەیگرتنەوە، بۆیە كورد بوون لەو دەمەدا مانای جوداخوازی ئەگەیاند . ئەمرۆ رۆژگارێكی تەواو جیاوازە ، توركیا پاش ئەو گۆرانكاریانەی لە نێوخۆدا روویدا و ئەوەی بە دەوڵەتی قوڵ ناوئەبرێت لەدەستی جەنەراڵە سەربازیە نەژادپەرستەكان دەركرا ، و دواتریش توركەكان زیرەكانە هەستیان بە زەمینەسازی گۆرانكاری لەرۆژهەڵاتی ناوەراستتدا كرد زانیان كە ئاشتی ئەتوانێت توركیا رزگار بكات لە جەنگێكی خوێناوی پەنجا ساڵە ( ئەوان پێی ئەڵێن جەنگی تیرۆر) و هەر ململانێیەكی تری هاوچەرخ، بۆیە پەنایان بۆ ئاشتی برد كە ئەمەش ویست و بەرژەوەندی هەموو لایەكە. كورد بەم هەنگاوە سەلماندی كە مرۆڤی سەردەمەو ئەتوانێت گۆرانكاری ریشەیی بكات و چەكی لە پێناوی چەكداری و توندوتیژیدا هەڵنەگرتووە بەڵكو چەك تاكە رێگا بووە كە لە سرینەوە بیپارێزێت. ئەگەر بەوردی خوێندنەوە بۆ جوڵەكانی ئەمڕۆ بكەین پەیامگەلێكی زۆر ئەبینین! ئایا گەریلاكان بۆ لە ئەشكەوتەوە هاتن و گەرانەوە بۆ ئەشكەوت؟ رەهەندی مێژوویی و ئاینی و سیاسی ئەشكەوت چیە؟ گەریلاكان بۆچی چەكەكانیان نەدا بەدەستی هیچ لایەنێك، واتا و ئاماژەكانی سوتاندن چین؟ گەریلاكان بۆچی بەجل و بەرگی گەریلاییەوە گەرانەوە شاخ؟ بۆچی لە وێنەو ڤیدیۆكاندا ئامادەبوان پیشان نەدران و ڤۆكسی كامێراكان تەنها لەسەر جوڵەی گەریلاكان بوون؟ هەروەها بۆچی راستەوخۆ مەراسیمەكە پەخش نەكرا؟ ئەمانەو چەندین تێبینی تر كە ئاستی ئەم جوڵە سیاسیەو رەهەندەكانیمان بۆ دەرئەخەن. ئاشكرایە كە ئێستا پرۆسەی ئاشتی لە توركیا قۆناغ ئەبڕێت و هەنگاو بەرەو دروست كردنی متمانە ئەنێت ، دواجار ئەوە توركەكانن كە ئەبێت دەست بە هەنگاوەكانیان بكەن هەر لە هەمواری دستور تا رەخساندنی ئازادی سیاسی ، بۆیە ئێستا جیهان لە چاوەڕوانی وەرچەرخانی مێژووییە لە توركیا ، كە رێگە خۆش كەر ئەبێت بۆ كرانەوەو گەشەسەندنی زیاتری توركیا. توركیا زەمینەی فراوانتركردنی پانتایی دیموكراسی هەیە بەهۆی هاوسنوری لەگەڵ ئەوروپا و جوانی ژینگەكەی كەبۆتە مایەی كۆچی مرۆڤی رەگەزو نەتەوە جیاوازەكانی دنیا بۆ ئەم وڵاتە بۆیە دەكرێت توركیا بە وڵاتێكی مەڵتی كەڵچەر پێناسە بكرێت چونكە لە توركیادا جگە لە تورك و كورد و ئەرمەن و عەرەب دەیان نەتەوەو ئاین و ئاینزا ژیان ئەكەن ، بۆیە توركیا ئەبێت خۆی لە تەوقی نەتەوەپەرستی رزگار بكات و ببێت بە ژینگەیەكی فرەرەنگ تاكو بتوانێت بە ئاواتی لە مێژینەی بگات كە ئەویش ئەندام بوونە لەیەكێتی ئەوروپا . ئایا لەم نێوەندەدا كورد ئەتوانێت چی بەدەست بهێنێت؟ كورد لەباكور رێژەیەكی بەرز لە كۆمەڵگای توركیا پێك ئەهێنێت ، ئەگەر توركیا ببێت بەخاوەن دستورێكی كراوە و ئازادی سیاسی و جیاوازی نەتەوایەتی پەسەند بكات و دان بە مافە سەرەتاییەكانی كوردا بنێت لەو پارچەیە ، كورد ئەتوانێت لە رێگای خەباتی مەدەنی و پەرلەمانیەوە مافەكانی خۆی بەرجەستە بكات ، چونكە كورد لەم دۆخە ئاڵۆزەدا توانیوێتی رێژەیەكی زۆری كورسیەكانی پەرلەمان بەدەست بهێنێت و لە هەڵبژاردنی شارەوانیەكاندا بەشی زۆری سەرۆكی شارەوانیەكان مسۆگەر بكات كە بریتین لەدەسەڵاتی خۆجێی شارو شارۆچكەكان ، بۆیە لەكاتی هەبوونی دستورێكی دیموكراسی كورد لە باكور بەدەستی خۆی مافەكانی مسۆگەر ئەكات و پێویستی بە پێشكەش كردنی داخوازی نامێنێت. ئەو وتارانەی لە ماڵپەڕی رادیۆی نەوا بڵاودەكرێنەوە تەنها گوزارشت لە بۆچونی نوسەرەكانیان دەكات.