نەوا-
وەزارەتی دەرەوەی ئێران لە ڕاگەیەندراوێكی فەرمیدا، هێرشە بەرفراوانەكانی سوپای ئەمریكای بۆ سەر خاكی وڵاتەكەی لە شەوی ڕابردودا بە توندی شەرمەزاركرد.
ئاماژەی بەوەشدا، ئەم هێرشانە نەك تەنها پێشێلكردنی جاڕنامەی نەتەوە یەكگرتوەكان و یاسا نێودەوڵەتییەكانە، بەڵكو ڕێككەوتنی ئاگربەستی 7ـی نیسانی بە كردەوە لەباربردوە و بێمانا كردوە.
هەروەها تاران هۆشدارییەكی توندی ئاراستەی وڵاتانی ناوچەكە كرد و داوای لێكردن پابەندی بەڵێنە یاسایی و ئەخلاقییەكانیان بن و ڕێگە نەدەن سوپای ئەمریكا خاك، دامەزراوە و سەرچاوەكانیان بۆ هێرشكردنە سەر ئێران بەكاربهێنێت.
وەزارەتی دەرەوە دوپاتیشی كردەوە، ئێران لە چوارچێوەی مافی بەرگریی ڕەوادا، سورە لەسەر ئەوەی سەرچاوە و بنكەی ئەو هێرشانە لەناو ببات كە دەكرێنە سەر خاكی وڵاتەكەی و وەڵامی هەر دەستدرێژییەكی ئەمریكا و هاوپەیمانەكانی بداتەوە.