نەوا-
ئەمڕۆ ئەنجومەنی وەزیرانی عێراق كۆبوونەوەی ئاسایی خۆی ئەنجامدەدات و بڕیارە پرسی مووچەی مانگی شەشی مووچەخۆرانی هەرێم تاوتوێ بكات. 
بڕیارە پاش نیوەڕۆی ئەمڕۆ سێشەممە، ئەنجومەنی وەزیرانی عێراق بە سەرپەرشتی محەمەد شیاع سوودانی، سەرۆك وەزیران كۆبێتەوە، چاوەڕوان دەكرێت لە پەراوێزی كۆبوونەوەكەدا هاوشێوەی كۆبوونەوەكانی ڕابردوو پرسی مووچەی فەرمانبەرانی هەرێمی كوردستان تاوتوێ بكرێت.
ئەمە لە كاتێكدایە، هەفتەی ڕابردووش ئەنجومەنی وەزیرانی عێراق بڕیاری دا مووچەی مانگی شەشی فەرمانبەرانی هەرێم دابەش بكرێت، بەڵام بەو مەرجەی حكومەتی هەرێم پابەندبێت بە ڕادەستكردنی نەوت و 120 ملیار دیناری داهاتی ناوخۆ و تەوتینكردنی مووچە.
بە گوێرەی زانیاریەكانیش، لە ئێستا هەولێر و بەغدا جەخت لەوە دەكەنەوە كە دۆسیەی نەوت چارەسەركراوە، بەڵام ئەوەی بە چارەسەرنەكراوی ماوەتەوە پرسی داهاتی نانەوتییە كە حكومەتی هەرێمی كوردستان دەڵێت 120 ملیار دینارەكە زۆرە و ناتوانێت ئەو بڕە بداتە بەغدا.