نەوا-
بەئامادەبونی جەلال شێخ نوری سەرپەرشتیاری ئیدارەی گەرمیان لە مەراسیمێكدا 64 پارچە زەوی بەسەر راگیراوانی ئەنفالی ناحیەی سەرقەڵا دابەشكرا. 
ئیدارەی گەرمیان بڵاویكردوەتەوە، لە مەراسیمێكدا 64 پارچە زەوی بەسەر سودمەندبوانی ناحیەی سەرقەڵا كە راگیراوی ئەنفالن دابەشكراوە، لەو مەراسیمەدا سەرپەرشتیاری ئیدارەی گەرمیان رایگەیاند، خۆشحاڵن راگیراوانی ئەنفالی ناحیەی سەرقەڵا كە سودمەندبون لە فەرمانی وەرگرتنی زەوی كە لەساڵی 2018ـەوە لەلایەن قوباد تاڵەبانی جێگری سەرۆكی ئەنجومەنی وەزیرانەوە فەرمانیان بۆ دەرچوە بۆ نزیكەی 2 هەزارو 400 كەس لەگەرمیان.
وتیشی، لەماوەی ساڵانی رابردودا بەهۆی نەبونی زەوی لەسنوری شارەوانی و كێشەی شوێنی نیشتەجێبون لە فەرمانەكەو لەبەرچاوگرتنی داخوازی سودمەنبوانی سەرقەڵا، پرۆسەی دابەشكردنی زەوی دواكەوت، بەڵام كۆتا وەجبەی سودمەنبوان زەوییان پێدرا.
جێی ئاماژەیە دابەشكردنی ئەم زەوییانە كۆتا قۆناغی دابەشكردنی زەوی بو كە لەساڵی 2018 بڕیار بۆ دوو هەزارو 374 پارچە زەوی بەسەر كەسوكاری ئەنفالكراوان و شەهیدان و زیندانیانی سیاسی و راگیراوانی ئەنفالی گەرمیان دەرچو.