نەوا-
وەزارەتی گواستنەوە و گەیاندنی عێراق رایگەیاند، نرخی بلیتەكانی نێوان عێراق و لوبنان بەرزنەكراوەتەوە.
نوسینگەی ڕاگەیاندنی وەزارەتی گواستنەوە و گەیاندنی عێراق لە ڕاگەیەندراوێكدا ئاشكرایكردوە، ئەوەی لە هەندێك سایتی سۆشیال میدیا سەبارەت بە نرخی بلیت لە نێوان عێراق و لوبنان بڵاوبوەتەوە، دورن لە راستیەوە و ئەو زانیاریانەی بڵاودەبنەوە نادروستن و لەسەر بنەمای سەرچاوەیەكی فەرمی نییە.
باسی لەوەشكرد، نرخی فەرمی و پەسەندكراوی گەشتێكی هاتوچۆ لە نێوان عێراق و بەیروت تەنها 471 هەزار دیناری عێراقییە، نەك ئەو بانگەشەیەی كە بڵاوكراوەتەوە و گوایە نرخی بلیتەكە گەیشتوەتە 505 دۆلاری ئەمریكی.
لە ڕاگەیەندراوەكەدا ئاماژە بەوەشدراوە، خەڵك دەتوانن لەڕێگەی ماڵپەڕی فەرمی كۆمپانیاكە یان فەرمانگە ڕێگەپێدراوەكانییەوە نرخەكان پشتڕاستبكەنەوە بۆ دڵنیابون لە دروستی زانیارییەكان لە سەرچاوە دروستەكەیەوە.
ئەوەش هاتوە، هەمو ئەو بلیتانەی لە ڕێگەی ئۆفیسی كۆمپانیاكە لە بەیروت فرۆشراون، بەو نرخە فەرمییەی كە لە سیستەمی فەرمیدا دانراوە، بەبێ هیچ زیادكردنێك فرۆشراون.