نەوا-
باڵیۆزخانەی ئۆكرانیا لەعیراق ئەو زانیاریانەی رەتكردەوە كە راهێنانیان بە چەكداران و دروستكردنی فڕۆكەی بێفڕۆكەوان بە نایاسایی لە دەرەوەی ئۆكرانیا كردبێت.
لە راگەیەنراوێكدا باڵیۆزخانەی ئۆكرانیا لەعیراق بڵاویكردوەتەوە، ئەو راپۆرتانەی لەهەندێك كەناڵی راگەیاندن بڵاوكراونەتەوە رەتدەكەنەوە كە تیایدا وڵاتەكەیان تێوەگلاندوە لە ئامادەكردن و راهێنانی چەند كەسێك بۆ بەشداریكردن لە چالاكییەكی نا یاسایی لەناو خاكی عیراق و هەرێمی كوردستاندا.
ئاماژەشیكردوە، بەهیچ شێوەیەك ئۆكرانیا هەڵنەستاوەو هەڵیشناستێت بە هەر چالاكییەك كە پەیوەندیدار بێت بە راهێنانی چەكداران و دروستكردنی فڕۆكەی بێفڕۆكەوان بۆ بەكارهێنانێكی نایاسایی لە دەرەوەی وڵاتەكەیاندا، ئەو بانگەشانەش زانیاریی چەواشەكارانەن و پشت بەهیچ بنەمایەكی راستی نابەستن، هەروەها بڵاوكردنەوەی ئەو جۆرە زانیارییە ناڕاستانە هەوڵێكە بۆ لەكەداركردنی ناو و ناوبانگی ئۆكرانیاو سەركردەكانی.
باڵیۆزخانەی ئۆكرانیا لەعیراق داواشی لە كەناڵەكانی راگەیاندن كردوە پشت بە سەرچاوە فەرمییەكان ببەستن بۆ وەرگرتنی زانیاری و رێگەبگرن لە بڵاوكردنەوەی پڕوپاگەندو راپۆرتە نافەرمییەكان.
جێی ئاماژەیە دوای هێرشەكەی سەر هۆتێل لالەزار ژمارەیەك دەستگیر كراو دانیاننا بە پلانێكدا بۆ كوشتنی سەرۆكی یەكێتی و كودەتاكردن لەناو حزبەكەدا، بۆ ئەوەش باسیان لەوەكردبو كە لەناو خاكی ئۆكرانیادا مەشقیان لەسەر فڕۆكەی بێ فڕۆكەوانی خۆكوژ كردوە.