نەوا-
بەڕێوەبەری باخچەكانی سلێمانی رایگەیاند، سەرەڕای وشكەساڵی و كەمبونەوەی ئاو، باخچەو پارك و بلوارەكان دەپارێزین و ناهێڵن وشك ببن.
بەهرۆز سالار بەڕێوەبەری باخچەكانی سلێمانی لەلێدوانێكدا بۆ سایتی فەرمی یەكێتی رایگەیاندوە، ‎تەنها لەسنوری بەڕێوەبەرایەتی باخچەكانی سلێمانی 510 باخچە ‎هەیە، جیا لەوەش حەوت پاركی گەورە لەناو شاردا هەیە 85 بلواری سەرەكیش هەن كە سەرجەمیان سەوزكراون و خزمەت دەكرێن.
راشیگەیاندوە: لەپاركی ئازادی زیاتر لە 11 بیری ئاویان هەیە، بەڵام لەو ژمارەیە 10 بیریان وشكبون ئەوی دیكەشیان ئاوی كەم تێداماوە، ئەمانە هەمویان گرفتن بەهۆی ئەو وشكەساڵییەی هەرێمی كوردستانی گرتوەتەوە، لەئێستاشدا گرێبەستیان لەگەڵ كۆمپانیای ئاودێری تەواو بوە بە تانكەری حكومی ئاودێریی دەكەن.
بەڕێوەبەری باخچەكانی سلێمانی ئاماژەی بەوەشكردوە: بەو پلانانەو ئەو سەوزكردنانەی هەیانە، نزیكدەبنەوە لەڕێژەی ستانداردی جیهانی بۆ سەوزایی، لەسنوری بەڕێوەبەرایەتییەكەیان رێژەی سەوزایی (19.6٪)ە لـەبـەرامبەردا رێـژەی ستانداردی جیهانیی دەبێت (20٪) بێت، ئەوەش بەسەوزكردن و كردنەوەی پارك و باخچەو خزمەتكردن و نۆژەنكردنەوەیان نزیكدەبنەوە لە رێژەی ستانداردی جیهانی بۆ سەوزایی.