نەوا
وەزارەتی پێشمەرگە بۆ رووبەروبوونەوەی داعش سێ فەوجی پێشمەرگە بە چەكی قورسەوە رەوانەی گەرمیان دەكات.
دوای ئەوەی لە رۆژانی رابردوودا پەلامارەكانی داعش بۆ سەر ناوچەی كوڵەجۆی كفری و چەند ناوچەیەكی دیالە چڕ بوونە، رۆژی هەینی سێ فەوجی وەزارەتی پێشمەرگە بە چەكی قورسەوە رەوانەی گەرمیان كران.
هاوكات جەعفەر شێخ مستەفا جێگری سەرۆكی هەرێم بۆ كاروباری سەربازی بە یاوەری چەند فەرماندەیەك سەردانی میحوەرەكانی گەرمیانی كرد و لە لێدوانێكدا رایگەیاند؛ هاتوین پاڵپشتی سەرۆكایەتی هەرێم بۆ هێزەكانی پێشمەرگە دوپات بكەینەوە و لە نزیكەوە لە رەوشی ناوچەكە ئاگاداربین و لە پێویستیەكانیان بكۆڵینەوە بۆئەوەی سنورەكان تۆكمەتر بكرێن.
وتیشی:"لە هەر شوێنێك پێویست بێت، هێزی پشتیوانی رەوانەی ئەو ناوچانە دەكەین".
لەماوەی یەك هەفتەی رابردوودا چەكدارانی داعش لە دوو پەلاماردا سێ كارمەندی ئاسایش و سێ پێشمەرگەیان لە سنوری كوڵەجۆی سەر بە قەزای كفری و گوندی دەكەی نزیك خانەقین شەهید كردوە.