به‌شیر حه‌داد: به‌ ئارامبوونه‌وه‌ی دۆخی عێراق گفتوگۆكانی هه‌رێم و به‌غدا ده‌ستپێده‌كه‌نه‌وه‌

19/01/2020 عێراق

نه‌وا
جێگری سه‌رۆكی په‌رله‌مانی عێراق ده‌ڵی سه‌ردانه‌كه‌ی عادل عه‌بدولمه‌هدی بۆ هه‌رێم، ئاماژه‌یه‌ بۆ به‌رده‌وامی ئه‌و رێككه‌وتن و گفتوگۆیانه‌ی، كه‌ پێشتر له‌ نێوان هه‌ولێر و ناوه‌ند كراون، باس له‌وه‌شده‌كات، به‌ ئارامبوونه‌وه‌ی بارودۆخه‌كه‌ سه‌ردان  و گفتوگۆكان ده‌ست پێ ده‌كه‌نه‌وه‌.
به‌شیر حه‌داد به‌ ماڵپه‌ڕی فه‌رمی پارتی راگه‌یاندووه‌، په‌یوه‌ندی نێوان هه‌رێم و به‌غدا له‌ ئاستێكی باشدایه‌، كه‌ گه‌یشتبوونه‌ ئاستێكی به‌رز و تیمه‌ هوونه‌رییه‌كان خه‌ریكی كاری خۆیان بوون، گفتوگۆكان و هاتووچۆی شانده‌كانیش به‌رده‌وامی هه‌بوو، هه‌تا رووداوی خۆپێشاندانه‌كانی باشوور و نێوه‌ڕاستی عێراق، كه‌ بارودۆخی ئاڵۆزكرد، به‌و هۆیه‌شه‌وه‌ حكوومه‌تی عێراق زیاتر سه‌رقاڵی خۆپێشاندان و ئه‌و بارودۆخه‌ بوو، كه‌ تێیكه‌وتبوو، بۆیه‌ گفتوگۆ و سه‌ردانه‌كان ساردی تێكه‌وت، هاوكات هۆكارێكی دیكه‌یشی، ده‌ستله‌كار كێشانه‌وه‌ی سه‌رۆكوه‌زیران بوو.
 جێگری سه‌رۆكی په‌رله‌مانی عێراق وتیشی، "سه‌ردانه‌كه‌ی عادل عه‌بدولمه‌هدی، كه‌ له‌ رۆژانی رابردوودا ئه‌نجامی دا و له‌گه‌ڵ سه‌ركرده‌كانی كوردستاندا كۆبووه‌وه‌، ئامانجی برودان و به‌ره‌و پێشه‌وه‌بردنی گفتوگۆ و رێككه‌وتنه‌كانی نێوان هه‌ولێر به‌غدایه‌.
به‌شیر حه‌داد پێیوایه‌ گفتوگۆكان كاتێك به‌رده‌وامی ده‌بێت، كه‌ بودجه‌ی گشتی عێراق بڕواته‌ ئه‌نجوومه‌نی نوێنه‌ران، هاوكات له‌گه‌ڵ پێكهێنانی كابینه‌ی نوێشدا گفتوگۆكان چڕتر ده‌بن و ده‌گه‌نه‌ رێككه‌وتن.

شەپۆلەکانی نەوا

Copyright © 2017 - Radio Nawa. Designed and Developed by Avesta Group