نەوا-
دەزگای هەواڵگری توركیا (میت) كوژرانی فەرماندەیەكی یەپەگەو پاسەوانەكانی راگەیاند.
ئاژانسی ئەنادۆڵ بڵاویكردۆتەوە، دەزگای هەواڵگری توركیا لەئۆپراسیۆنێكدا لەناوچەی منبجی سوریا، بەرپرسی منبجی یەكینەكانی پاراستنی گەل (یەپەگە) بەناوی ئومان دەروێش كە ناوە نهێنییەكەی شارا شەرڤین دەریك بوە لەگەڵ پاسەوانەكانی لە "چالاكی خراون".
راشیگەیاندوە، ناوبراو لەساڵی 1998دا پەیوەندی بە پارتی كرێكارانی كوردستان (پەكەكە)ـەوە كردوە، یەكێك بوە لە بەرپرسیارانی یەكینەكان بۆ مەبەستی ئەنجامدانی كردەوە لەشارە گەورەكانی توركیا، هەروەها فەرمانی ئەنجامدانی چالاكی كردوەو لەلایەن میتەوە خراوەتە ژێر چاودێرییەوە.
