نەوا
نوێنەری عەلی سیستانی گەورە مەرجەعی شیعەكانی عێراق جەختی لە هەمواری یاسای هەڵبژاردنەكان كردەوە و هەرجۆرە دەستوەردانێكی دەرەكیشی لە كاروباری ناوخۆیی عێراق رەتكردەوە.
ئەحمەد ئەلسافی نوێنەری عەلی سیستانی گەورە مەرجەعی شیعەكانی عێراق لە وتاری رۆژی هەینیدا رایگەیاند، پێویستە یاسای هەڵبژاردنەكان بە شێوەیەكی دادپەروەرانە هەموار بكرێتەوە و گۆڕانكاری لە كۆمسیۆنی هەڵبژادندا بكرێت.
نوێنەری سیستانی جارێكی تر دژایەتی مەرجەعیەتی باڵای شیعەكانی بۆ توندوتیژی نواندن بەرامبەر بە خۆپیشاندەران دەربڕی و رایگەیاند، پشتگیری داواكاریەكانی خۆپیشاندەران دەكەن و جەختیشیكردەوە، كە خۆپیشاندەران لە پێناو چاكسازیدا رژاونەتە سەر شەقام، بەڵام تا ئێستا هیچ هەنگاوێك بۆ چاكسازی نەنراوە.
هەروەك ئیدانەی دەستدرێژی بۆ سەر موڵكوماڵی گشتی و توندوتیژیەكانی بەرامبەر بە هێزە ئەمنیەكانیشی كرد.
لەبەشێكی تری قسەكانیدا نوێنەرەكەی سیستانی ئاماژەی بەوەكرد، عێراقیەكان گەورەترین زیانمەندی یەكەمی ئەو ململانێ دەرەكیەیە كە لە وڵاتەكەدا هەیە، بۆیە هەرجۆرە دەستوەردانێكی دەرەكی لە كاروباری ناوخۆیی عێراق و گۆڕینی وڵاتەكە بۆ گۆڕەپانی یەكلاییكردنەوەی ململانێ هەرێم و نێودەوڵەتیەكان رەتدەكەنەوە.