نەوا
وەزیری
دەرەوەی سعودیە رایگەیاند: گەڕانەوەی قاعیدە و داعش بۆ ئەفغانستان، مایەی نیگەرانی
قوڵە و باس لەوەشدەکات بە مەرجی پێکهێنانی حکومەتی گشتگیر ئامادەن دان بە
حکومەتەکەی تاڵیباندان بنێن.
فەیسەڵ بن
فەرحان، وەزیری دەرەوەی سعودیە، لە لێدوانێکدا رایگەیاند، "تیرۆریزمی
نێودەوڵەتی" بەردەوام جێگەی نیگەرانی وڵاتەکەیەتی و گەڕانەوەی داعش و قاعیدەش
بۆ ئەفغانستان، لە دوای گەڕانەوەی تاڵیبان بۆ حکومڕانی ئەو نیگەرانیەی زیاتر
کردووە.
وەزیری
دەرەوەی سعودیە باسی لەوشکرد، وڵاتەکەی هیج پەیوەندییەکی لەگەڵ تاڵیباندا نییە و
تەنها بە مەرجی پێکهێنانی حکومەتێکی گشتگیر، کە نوێنەری پێکهاتە و لایەنەکانی دیکەی
ئەفغانستانی تێدا بێت، ئامادەن دان بە حکومەتەکەی ئەو بزوتنەویەدا بنێن.
لە 15ی ئابەوە
تاڵیبان دەستی بەسەر کابۆلدا گرتوەتەوە و بەوەش پاش 20 ساڵ گەڕایەوە بۆ حکومڕانی
ئەو وڵاتە، بەڵام لە حکومەتە کاتیەکەیدا لایەنە سیاسیەکانی دیکەی پەراوێز خستووە.
ساڵی 2001 و
دوابەدوای هێرشەکانی 11ی سێپتەمبر، ئەمریکا و هاوپەیمانەکانی بە هۆی داڵدەدانی
قاعیدەوە، هێرشیان کردە سەر ئەفغانستان و کۆتاییان بە حکومەتی تاڵیبان هێنا.
لە ئێستاشدا
بەشێکی زۆر لە وڵاتانی جیهان نیگەرانن لەوەی، بە سەرلەوێ گەڕانەوەی تاڵیبان بۆ
حکومڕانی، نەک هەر قاعیدە بەڵکوو داعشیش ئەو وڵاتە بکەنە پەناگەیەک و لەوێوە ببنە
مەترسی بۆ سەر وڵاتانی دیکە.