گفتوگۆو دانوستانه‌كانی نێوان هه‌ولێرو به‌غدا ده‌ستپێده‌كاته‌وه‌

پێش 4 هەفتە

نه‌وا-كاروان مه‌حمود 
به‌رپرسی نوێنه‌رایه‌تیی حكومه‌تی هه‌رێمی كوردستان له‌ به‌غدا رایده‌گه‌یه‌نێت، ئیراده‌یه‌كی جدی هه‌یه‌ له‌ نێوان هه‌ولێرو به‌غدا بۆ چاره‌سه‌ركردنی كێشه‌كان و چاوه‌ڕوانده‌كرێت دوای ره‌وانه‌كردنی پرۆژه‌ یاسای بودجه‌ بۆ په‌رله‌مان گفتوگۆو دانوستانه‌كان ده‌ستپێبكاته‌وه‌.
فارس عیسا به‌رپرسی نوێنه‌رایه‌تیی حكومه‌تی هه‌رێمی كوردستان له‌ به‌غدا له‌ لێدوانێكدا بۆ رادیۆ نه‌وا رایگه‌یاند، خۆپیشاندانه‌كان كاریگه‌ری له‌سه‌ر گفتوگۆو رێككه‌وتنه‌كانی نێوان هه‌ولێرو به‌غدا هه‌بووه‌و دۆخه‌كه‌ به‌وجۆره‌ نه‌بووایه‌ سه‌ردانی لیژنه‌كانی هه‌رێم و به‌غدا به‌رده‌وامی ده‌بوو ره‌نگه‌ تائێستا هه‌ردوولا بگه‌شتنایه‌ته‌ ئه‌نجامێك.
باسی له‌وه‌شكرد، بێگومان كێشه‌كانی نێوان هه‌ولێرو به‌غدا كێشه‌ی ئاڵۆزن و چاره‌سه‌ر كردنی ئاسان نییه‌، به‌وهۆیه‌وه‌ لیژنه‌ش پێكهێنراوه‌ تاوه‌كو هه‌ردوولا بگه‌ینه‌ ئه‌نجامێكی كۆتایی به‌ڵام ئه‌گه‌ر كێشه‌كان قوڵ نه‌بووایه‌ به‌ئاسانی چاره‌سه‌ر ده‌كراو تا ئێستا گه‌یشتبووینه‌ رێككه‌وتن. 
ئاشكراشیكرد، ئیراده‌یه‌كی جدی هه‌یه‌ له‌ هه‌ردوولاوه‌ بگه‌نه‌ رێككه‌وتن و لێكتێگه‌شتنیش هه‌یه‌ له‌وباره‌یه‌وه‌و چاوه‌ڕوانده‌كرێت له‌ هه‌فته‌ی داهاتوو پرۆژه‌ یاسای بودجه‌ی 2020 له‌ حكومه‌تی عیراق كۆتایی پێبهێنرێت و ره‌وانه‌ی په‌رله‌مان بكرێت ئه‌وكاتیش دانوستانه‌كانی نێوان هه‌ولێرو به‌غدا ده‌ستپێده‌كاته‌وه‌. 
له‌باره‌ی پشكی هه‌رێمی كوردستان له‌ بودجه‌ی 2020ی عیراق، فارس عیسا به‌رپرسی نوێنه‌رایه‌تیی حكومه‌تی هه‌رێمی كوردستان له‌ به‌غدا وتی: "تائێستا پرۆژه‌ یاساكه‌ له‌ حكومه‌تی عیراق كۆتایی نه‌هاتووه‌و كاری تێدا ده‌كرێت و ره‌وانه‌ی په‌رله‌مان نه‌كراوه‌ ئێمه‌ش نازانین پشكی هه‌رێم چۆن دیاریكراوه‌ به‌ڵام ئه‌وان ده‌زانن پشكی هه‌رێم چه‌نده‌ چونكه‌ پێشتر راپۆرتی خۆمان ره‌وانه‌ كردووه‌و دانوستان هه‌بووه‌و بۆچوونی خۆشمان ئاشكرا كردووه‌ ئه‌وانیش ره‌چاوی ئه‌و دۆخه‌ ده‌كه‌ن".
راشیگه‌یاند، هه‌ركات پرۆژه‌ یاسای بودجه‌ له‌ حكومه‌ت كۆتایی پێهێنراو ره‌وانه‌ی ئه‌نجومه‌نی نوێنه‌ران كرا ئێمه‌ش ده‌زانین چ شێوازێك بۆ هه‌رێمی كوردستان دیاریكراوه‌و ئه‌وكاتیش قسه‌ی خۆمان ده‌بێت.

شەپۆلەکانی نەوا

  • زۆرترین خوێندراو
  • دواترین هەواڵ
Copyright © 2017 - Radio Nawa. Designed and Developed by Avesta Group