چاودێرێك: بەتیرۆریست ناسینی سوپای پاسداران راستەوخۆ كارناكاتە سەر خەباتی چەكداری رۆژهەڵات

پێش 2 هەفتە محەمەد حەسەن

نەوا- 
نوسەر و چاودێرێكی رۆژهەڵاتی كوردستان پێیوایە كە بە تەنها پرسی دانانی سوپای پاسداران لە لیستی تیرۆری ئەمریكا نابێتە هۆی هەڵكشان یان داكشانی خەباتی چەكداری رۆژهەڵاتی كوردستان، هەروەك پێشیوایە كە بەهۆی بڕیارەكەوە دورنییە سوپای پاسداران لە ناوخۆ پەنا بۆ سەركوتی زیاتر ببات، بەڵام ئەوەش تا سەر نابێت و خەڵك ترسیان شكاوە و گۆڕەپانی بەربەرەكانێ لەگەڵ سەركوت بەرینتر دەكەن.
رۆژی 8 ی نیسان دۆناڵد ترامپ سەرۆكی ئەمریكا رایگەیاند، سوپای پاسدارانی ئێران دەخەنە لیستی رێكخراوە تیرۆریستیە بیانیەكانەوە، ئەمەش یەكەمجارە هێزێكی فەرمی وڵاتان بكەوێتە ئەو لیستەوە.
بەشێك لە وڵاتانی ناوچەكە لە ناویاندا ئیسرائیل و سعودیە پێشوازیان لەو بڕیارە كردووە و عێراقیش دژیەتی، هەرچی لایەنی ئێرانیشە هەڕەشەی هەڵوێستوەرگرتن و دژكردەوە دەكەن.
حزب و لایەنە سیاسیەكانی رۆژهەڵاتی كوردستانیش لەگەڵ بڕیارەكەی ئەمریكادان و بە بڕیارێكی درەنگ وەخت، بەڵام لە جێدا ناویان بردووە.
لە میانی گفتوگۆیەكی تیابەتی رادیۆ نەوا، عەبدوڵا حیجاب، نوسەر و چاودێری سیاسی لە بارەی كاریگەری بڕیارەكەی ئەمریكا بۆ بە تیرۆریست ناساندنی سوپای پاسداران لەسەر خەباتی چەكداری رۆژهەڵاتی كوردستان بە ئاماژەدان بەوەی خەباتی رۆژهەڵات تەنها سەربازی نەبووە و تەنها لە دژی سوپای پاسدارانیش نەبووەوتی: پێم وانیە تەنها بە هۆی ئەوەی ئەمریكا سوپای پاسدارانی خستوەتە لیستی رێكخراوە تیرۆریتسیەكانەوە، ئەو پرسە كاری گەری راستەوخۆی لەسەر گەشەكردن و هەڵكشان و داكشانی خەباتی چەكدارانەی بزوتنەوەی كورد لە رۆژهەڵات بێت، هەرچەند دەتوانێت دەرفەت بۆ ئەوە بڕەخسێنێت كە خەباتی چەكداری گەشە بكات، ئەمەش بەو مەرجەی هێزەكان لەسەر ئەو بڕوایە بن كە خەباتی چەكداری دەتوانێت دەرفەتی نوێ بخوڵقێنێت.
ئەو چاودێرە سیاسیە جەختیشی كردەوە، كە ناكرێت هیچ هێزێكی سیاسی تەنیا و تەنیا لەسەر بنەمای سیاسەتی وڵاتێكی زلهێز یان سیاسەتی دەرەوە، سیاسەتی خۆی لە ناوچەكەدا دابڕێژێت.
دەربارەی ئەوەی كە ئایا لەمەودوا خەباتی چەكداری كورد لە دژی ئێران و سوپای پاسداران دەكەوێتە چوارچێوەی شەڕ لە دژی تیرۆر، عەبدوڵا حیجاب نوسەر و چاودێری سیاسی وتی: هێزەكانی رۆژهەڵات ناتوانن بە بێ لەبەرچاوگرتنی هەلومەرجی سیاسی خۆیان، دۆخی ناوخۆیی، پارسەنگی هێز تەنیا و تەنیا بێن و لەسەر بنەمای بڕیارێكی ئەمریكا خەباتی خۆیان بە شێوەیەك گەشەپێبدەن، كە قورسایی خەبات لە دژی رێكخراوێكی تیرۆریستی تەنها لەسەر شانی كورد بێت، بە بێ ئەوەی كورد توانایی ئەوەی هەبێت كە بە تەنها ئەو بارە قورسە هەڵبگرێت.
دەربارەی كاریگەری بڕیارەكە لە سەر ناوخۆی ئێرانیش، عەبدوڵا حیجاب رایگەیاند: لەبەر ئەوەی سوپای پاسداران ناتوانێت لەبەرامبەر ئەمریكا خۆڕاگری بكات، هەمو هێزی خۆی دەخاتە سەر سەركوتی ناوخۆیی و رووبەڕووی كۆمەڵگای مەدەنی دەبێتە و ئەمەش دەتوانێت مەترسیدار بێت، بەڵام بەو واتایە نییە كە  ئەو مەترسیە دەتوانێت تا سەر درێژەی هەبێت، رژێم دەتوانێت گوشاری خۆی چڕبكاتەوە، بەڵام لەبەرامبەریشدا خەڵكیش ئەو ترسەی نەماوە كە جاران لە رژێمی هەبوو، بۆیە ئەگەری ئەوە هەیە كە خەڵك بەشێوەیەكی بەرینتر و لە گۆڕەپانی جیاوازدا دژایەتی رژێم و ناوەندەكانی سەركوت بكەن.


شەپۆلەکانی نەوا

Copyright © 2017 - Radio Nawa. Designed and Developed by Avesta Group