نەوا-
لەمەراسیمێكدا بەئامادەبونی پارێزگاری كەركوك و وەزیری نەوتی عیراق، پرۆژەی وێستگەیەكی نەوتی خاو لەشارەكە كرایەوە.
بەگوێرەی راگەیەنراوێكی نوسینگەی پارێزگاری كەركوك، حەیان عەبدولغەنی جێگری سەرۆك وەزیران بۆ كاروباری وزەو وەزیری نەوت و رێبوار تەها پارێزگاری كەركوك و محەمەد حافز سەرۆكی ئەنجومەنی پارێزگاو بریكارانی وەزیرو بەڕێوەبەرانی گشتی، پڕۆژەی وێستگەی نەوتی خاو لە كێڵگەی جەمبوری باكور كرایەوە.
لەمەراسیمەكەدا وەزیری نەوت رۆڵی پارێزگاو ئیدارەی كەركوكی لە پشتیوانیكردنی كەرتی نەوت بەرزنرخاندو جەختیكردەوە، وەزارەتەكەی پرۆشە بۆ پەرەپێدانی كێڵگە نەوتییەكان لە كۆمپانیای نەوتی باكور لە رێگەی جێبەجێكردنی پرۆژەو هەوڵە نیشتمانییەكان و گرێبەست لەگەڵ كۆمپانیا جیهانییەكاندا تا بەرهەمی نەوت زیادبكەن.
وەزیری نەوت راشیگەیاند، هەروەك پەرۆشن تا سەرچاوەكانی نەوت و غاز لە وڵاتدا فراوان بكەن تاكو بە ئەرێنی كاریگەریی لەسەر سەرچاوە داراییەكان بكات و رۆڵی هەبێت لە دابینكردنی بودجەی ساڵانەدا.
جێی ئاماژەیە، كێڵگەی نەوتی خاوی جەمبور توانای بەرهەمهێنانی دەگاتە 25 هەزارو 600 بەرمیل نەوت و 25 هەزار مەتر سێجا غاز لە رۆژێكدا.