نەوا-
دەزگای ئاسایشی هەرێم و وەزارەتی ناوخۆی عیراق كۆنگرەیەكی رۆژنامەوانی هاوبەشیان ئەنجامداو تیایدا عەباس بەهادلی وتەبێژی وەزارەتی ناوخۆی عیراق رایگەیاند: بۆ روبەڕوبونەوەی بەڵای مادەی هۆشبەر بە یەك تیم كاردەكەن و جیاوازی نییە لەنێوان پارێزگاكان و دەزگا ئەمنییەكانداو هەماهەنگ بون لەگەڵ دەزگای ئاسایشی هەرێم و بەڕێوەبەرایەتی گشتی ئاسایشی سلێمانی.
وتیشی: لە ئۆپراسیۆنێكدا توانیویانە تۆڕێكی نێودەوڵەتی مادەی هۆشبەر دەستگیربكەن كە خاكی عیراقی بۆ گواستنەوەی مادەی هۆشبەر بەكاردەهێنا بۆ وڵاتێكی دراوسێ و 38 كیلۆگرامیان دەستبەسەردا گرتوە.
وتیشی: لەساڵی 2023ـەوە تائێستا 16 تۆن و 800 كیلۆگرام مادەی هۆشبەر دەستیبەسەردا گیراوەو 380 فەرمانی لەسێدارەدان بۆ بازرگانانی ماددەی هۆشبەر دەرچوە لەگەڵ 150 فەرمانی زیندانی هەتا هەتایی، هاوكات 190 فەرمانی دەستگیركردنی نێودەوڵەتی بۆ بازرگانانی ماددەی هۆشبەر دەركراوە.