لێكۆڵینەوە.. ئەوانەی توشی كۆرۆنا بون ئەگەری دوبارە توشبونەوەیان زۆر كەمە

3 رۆژ پێش ئێستا جیهان

نەوا
رێكخراوی تەندروستیی جیهانی رایگەیاند، لە تاقیكردنەوەیەكی سەر كارمەندانی تەندروستیی بەریتانیا دەركەوتوە ئەوانەی توشی ڤایرۆسی كۆرۆنا بون، ئەگەری توشبونەوەیان لە ماوەی شەش مانگی داهاتودا زۆر كەم بوە و ئەوەش هەواڵێكی دڵخۆشكەرە و جێگەی هیوایە بۆ بەرهەمهێنانی ڤاكسینەكان.
لەوبارەیەوە تیدرۆس ئەدهانۆم بەڕێوەبەری گشتی رێكخراوی تەندروستیی جیهانی لە رێگەی ڤیدیۆ كۆنفرانسەوە كۆبونەویەكی لەگەڵ شارەزایانی پەتازانی ئەنجامدا و رایگەیاند، لە ماوەی چوار هەفتەی رابردودا لەسەرتاسەری جیهان ژمارەی حاڵەتەكانی توشبون بەراورد بە شەش مانگی یەكەمی سەرهەڵدانی پەتاكە زیاتر بوە و بەشێكی زۆر بەشی چاودێری چڕی نەخۆشخانەكانی ئەوروپا و ئەمریكای باكور پڕبون.
ئاشكراشیكرد، هەواڵی دڵخۆشكەر هەن لەبارەی بەرهەمهێنانی ڤاكسینی ڤایرۆسی كۆرۆنای نوێ و وتی "ئەمە هیوای كۆتاییپێهێنانی ئەم ڤایرۆسەمان پێدەدات. لەم قۆناغەدا پێویستە ئەڵقەی بڵاوبونەوەكە تێكبشكێنین و ئەوەی لەدەستماندایە بەكاریبهێنین بۆ رزگاركردنی گیانی زیاتر".
لەلایەن خۆیەوە مایك ریان بەڕێوەبەری پرۆگرامی دۆخی بەپەلەی رێكخراوەكە و ماریا ڤان سەرۆكی تیمی بەرەنگاربونەوەی ڤایرۆسی كۆرۆنا لەبارەی تاقیكردنەوەی سەر كارمەندانی تەندروستیی بەریتانیا رایانگەیاند، ئەنجامەكە زۆر دڵخۆشكەرە و زۆریش گرنگە بەوەی بزانرێت ئاستی بەرگریی مرۆڤ لە بەرانبەر ئەو ڤایرۆسە چەندە.

شەپۆلەکانی نەوا

Copyright © 2017 - Radio Nawa. Designed and Developed by Avesta Group