نەوا-
وەزارەتی سامانە سروشتییەكانی حكومەتی هەرێم و وەزارەتی نەوتی عیراق لەسەر میكانیزمی هەناردەكردنەوەی نەوت رێككەوتن.
سەرچاوەیەكی ئاگادار بە كەناڵی كوردستان24ی وتوە، كۆبونەوەكان لە 17ـی تەمموزەوە دەستیانپێكردوەو لەمماوەیەدا سەردانی تەواوی كێڵگە نەوتییەكانی هەرێم كراوە، دوای هەڵسەنگاندنی كێشە هونەرییەكان و گفتوگۆیەكی زۆر، لە 11ـی ئەم مانگە رێككەوتن لەسەر میكانیزمی هەناردەكردنی نەوتی كێڵگەكانی هەرێمی كوردستان كراوە كە هەناردەكردنەكە بەگوێرەی بەرهەمی رۆژانەی كێڵگە نەوتییەكانی هەرێمی كوردستان دەبێت، ئەویش دوای ئەوەی 50 هەزار بەرمیل بۆ پێویستی ناوخۆی هەرێم گلدەدرێتەوەو بەرهەمەكەی دیكە بۆ هەناردەكردن رادەستی كۆمپانیای سۆمۆ دەكرێت.
هەر بەگوێرەی زانیارییەكانی ئەو سەرچاوەیە، كۆنوسی رێككەوتنەكە لەلایەن 17 ئەندامی شاندی وەزارەتی نەوتی حكومەتی فیدراڵ و 5 ئەندامی شاندی وەزارەتی سامانە سروشتییەكانی هەرێمی كوردستان واژۆ كراوەو ئێستاش شاندەكەی فیدراڵ گەڕاونەتەوە بەغدا، هەروەها بۆ دەستپێكردنەوەی هەناردەی نەوتی هەرێم ماوەتەوە حكومەتی فیدراڵ لەگەڵ حكومەتی توركیا گفتوگۆ بكات و پرۆسەكە جێبەجێ بكرێت.