نەوا-
شارەزایەكی كەشناسی دەڵێت، بەپێی پێشبینییەكان رۆژی چوارشەممەی داهاتوو یەكەم بارانی پایز بە شێوەی پچڕ پچڕ لە ناوچەكانی هەرێمی كوردستان دەبارێت.
ئاراس جەبار شارەزای كەشناسی پێشبینییەكانی بڵاوكردووەتەوە و رایگەیاندووە، رۆژی چوارشەممە 21ی ئەیلول كاریگەری شەپۆلی گەرما كەمدەبێتەوە و نزمبونەوەی پلەكانی گەرما دەستپێدەكات.
هێمای بۆ ئەوەش كردووە، لە رۆژانی 21 و 22ی ئەیلول یەكەم بارانبارینی پایزی ئەمساڵ لەناوچەكەدا دەستپێدەكات، كە بەشێوەی پچڕ پچڕ و لەناوچەی جیاجیا و بەشێوەیەكی هەڕەمەكی دەبێت.
بەپێی پێشبینییەكانی ئەو شارەزا كەشناسییە، بەهۆی بەردەوامی گاریگەری بەرزەپەستانی ژێر گەرم سبەینێ یەكشەممە ئاسمانی هەرێم ساماڵ و روون دەبێت، پلەكانی گەرما بە رێژەی یەك پلە بەرزتردەبنەوە، بەشێوەیەك بەرزترین پلەی گەرما لە هەولێر 41 پلە و لە سلێمانی و دهۆك و هەڵەبجە ئیدارەی راپەڕین و ئیدارەی سۆران 40 پلە دەبێت، هەروەها لە كەركوك 42 و لە گەرمیان 43 پلە دەبێت.