پەرلەمانتارێكی كوردستان دەڵێت: ئەگەر پارتی دیموكراتی كوردستان لەبەغدا شەڕی پۆست بكات، یەكێتیش دەتوانێت لە كوردستان داوای شایستەكانی خۆی بكات، چونكە پۆستەكانی بەغداو هەرێم بەرامبەرن.
شیرین یونس ئەندامی پەرلەمانی كوردستان لەسەر فراكسیۆنی یەكێتی بە سایتی فەرمی حزبەكەی وتوە، یارو نەیاریا شاهیدن كە یەكێتی هەمیشە لەبەشی لەخۆی كردۆتەوەو داوێتی بە لایەنەكانی تر، لە باوەڕی نیشتمانی خۆی لانادات و رێز لەلایەنەكانی تر دەگرێت، بەڵام كاتێك لایەنی بەرامبەر نابەرپرسیارانە ئەو هەستە نیشتمانیەی بەكاربهێنێت ئەوا سنوری بۆ دادەنێن و ناهێڵن ببەزێنێت.
لەبەشێكی تری لێدوانەكەیدا شیرین یونس لەبارەی پۆستی سەرۆك كۆمار رایگەیاندوە، پارتی دەستیداوەتە یاریەكی ترسناك ئەویش بچوككردنەوەو بەحزبیكردنی پۆستی سەرۆك كۆماری عیراقە، ئەگەر بۆ پارتی بچێتە سەر ئەوا خولێكی تر لایەنی عەرەب ئەو پۆستەش لە پارتی وەردەگرێتەوە، دواجار شكۆی كورد لەعیراق ژێر پێ دەكەوێت.
ئەو پەرلەمانتارەی یەكێتی پێیوایە كە پارتی هەڵەی كردوە لە كاندیدكردنی كەسێك بۆ پۆستی سەرۆك كۆمار كە بە وتەی ئەو "پێشتر لەسەر گەندەڵی لەپۆستی حكومەتی عیراق دورخراوەتەوەو متمانەی لێوەرگیراوەتەوەو بەلای عیراقیەكانەوە شایستەی ئەو پۆستە نیە".