لە یەكەم ڕۆژەوە، دەست پێ كردنی ئەوەی پەك و كورد ناوی لێ ناوە "پڕۆسەی ئاشتی" و تورك ناوی لێ ناوە "توركیای بێ تیرۆر"، وەك پڕۆسە پێم باش بووە. بەڵام یەك زەڕەش باوەڕم بە نییەت و نیازی تورك و توركیا و دەوڵەتی قووڵی توركیا و ئەردۆگان و باخچەلی نە هەیە، نە هەتا دنیاش ماوە دەبێت. 
تورك، بەڵێ تورك، نەك توركیا، بەڵێ تورك نەك دەوڵەتە قووڵەكە، نەك باوەڕیان بە بە لەناوبردنی كوردە بەڵكوو بە چڕی و بە خەستی لەسەر سڕینەوەی كورد و زمانەكەی ئیش دەكەن. 
دیارە من هێندە سادەگۆ نیم كە پێم وا بێت ئەوە جەوهەری ئینسانی توركە كە دەیەوێت كورد بسڕێتەوە، نەخێر ئەوە دەوڵەتی قووڵ و دەوڵەتی تورك و سیستەمی پەروەردە و خوێندن و میدیا توركیایە كە وای لە ئینسانی تورك كردووە ئەو باوەڕەی لا دروست بێت. 
دیارە ئەوەش دەزانم هەر شتێك دروستكراو بێت دەكرێت هەڵبوەشێتەوە، واتە دەكرێت مرۆڤی تورك وای لێ بكرێت كە باوەڕی بە مافەكانی كورد هەبێت تا دەگاتە ئاستی سەربەخۆیی و یەكسانیی و سەروەریش، بەڵام ئەوەی كە ئەو قەناعەتی لای من دروست كردووە ئەوەیە كە نە ئێستا، نە لە سەد ساڵی ڕابردوو، یەك ڕۆژیش نیازێكی وا لە زهنییەتی هەر سێ نوخبە سەرەكییەكی توركیا، نوخبەی ڕووناكبیریی و سیاسیی و بیزنێسی توركیا، نەبووە و نییە. تێگەیشتنی ئەو سێ نوخبەیەشە كە لە ڕێگەی دامەزراوە فەرمی و نافەرمییەكانی ئەو مرۆڤە دژەكوردە توركەی بەرهەم هێناوە. 
دیارە ئەوەش دەزانم هەندێك چەپی توركی، كەم تا زۆر، باوەڕیان بە هەندێك مافی كولتووری و زمانی كورد هەیە، بەڵام یەك زەڕە باوەڕم بەوانیش نییە چونكە نیازەكەی ئەوانیش زادەی تێگەیشتن لە مافەكانی ئینسانی كورد و نەتەوەی كورد نییە، بەڵكوو وەك ڕێگەچارەیەك تەماشای دەكەن بۆ هەڵنوەشانەوەی توركیا، وەك ڕێگرییەك لە جیابوونەوەی كورد ئەو چارەسەرییانەیان خستۆتە ڕوو. واتە هەوڵەكەی چەپەكان، بە چەپەكانی ناو پەكیش، بۆ بە توركیاییكردنی كوردە نەك بە تورككردنی كورد، كە هەموو ئەوانی دیكە هەوڵی بۆ دەدەن. 
ئەم دوو هەوڵە تۆزێك جیاوازان بەڵام هەر تێگەیشتنێك لە پرسی كورد، هەر چارەسەرێك بۆ پرسی كورد، هەڵقوڵاوی زیهنییەت و عەقڵییەت و دنیابینی ئەوی دیكە (تورك/توركیا، فارس/ئێران، عەرەب/عێراق و سووریا) بێت ناتوانێت چارەسەری پرسی كورد بكات. 
پرسی كورد تەنیا لە تێگەیشتنێكی كوردانە، كوردستانییانە، نیشتیمانییانە، لەخۆگرانە، كە باوەڕی بە یەكسانیی نەتەوەكان هەبێت، بە هەلی یەكسان هەبێت، بە ئازادی و ڕزگاریی هەبێت، بە سەروەریی و سەربەخۆیی و جیابوونەوە هەبێت، دەتوانێت هەنگاو بنێت بۆ چارەسەی پرسی كورد. كە ئەوكات، مەرج نییە كورد جیابێتەوە و دەوڵەتی سەربەخۆیی هەبێت، بەڵكوو دەكرێت ئازادانە لەگەڵ ئەوانی دیكە بژی بەڵام هەموو مافێكی هەبێت كە توركێك، عەرەبێك یان فارسێك، هەیەتی، وەك گوتم بە مافی دامەزراندنی دەوڵەتی خۆی. 

ئەو وتارانەی لە ماڵپەڕی رادیۆی نەوا بڵاودەكرێنەوە تەنها گوزارشت لە بۆچونی نوسەرەكانیان دەكات.