سەرۆكی فەڵەستین كۆتایی بە خزمەتی هەموو راوێژكارەكانی هێنا

19/08/2019 جیهان

نەوا
مەحمود عەباس سەرۆكی فەڵەستین بڕیاریدا بە كۆتایهێنان بە خزمەتی هەموو راوێژكارەكانی هەروەها ئەندامانی حكوومەتی پێشووی پابەندكردووە بە گەڕاندنەوەی بڕێكی زۆر پارەی زیادكراوی سەر مووچەكانیان.
ئاژانسی دەنگوباسی فەڵەستین لەو بارەیەوە بڵاویكردەوە كە مەحمود عەباس بڕیاریداوە بە هەڵوەشاندنەوەی كاركردن بەو بڕیار و گرێبەستانەی پەیوەستن بە راوێژكارەكانییەوە ، لەگەڵ راگرتنی ماف و ئیمتیازاتەكانیان كە بە هۆی پۆستەكانیانەوە وەری دەگرن. 
سەرۆكی فەڵەستین هەروەها بڕیاریداوە بە پابەندكردنی سەرۆكوەزیران و ئەندامانی كابینەی پێشووی حكوومەت بە گەڕاندنەوەی ئەو بڕە پارەیەرەی كە بە هۆی بڕیاری زیادكردنی مووچەكانیانەوە وەریان گرتووە. 
ئەم بڕیارانەی عەباس دوای ئەوە دێت كە ژمارەیەك لە چالاكوانانی فەڵەستینی لە سەرەتای مانگی حوزەیرانی رابردوو لە رێگەی تۆڕە كۆمەڵایەتییەكانەوە ئاشكرایان كرد كە بە بڕیارێكی عەباس مووچەی ئەندامانی كابینەی پێشووی حكومەت بۆ دوو هێندە زیادكراوە، ئەوەش كاردانەوە و نیگەرانی زۆری لەسەر شەقامی فەڵەستینی بەدوای خۆیدا هێنا. 

شەپۆلەکانی نەوا

Copyright © 2017 - Radio Nawa. Designed and Developed by Avesta Group