نه‌وا
ئه‌ندامێكی په‌رله‌مانی عیراق له فراكسیۆنی پارتی ده‌ڵێت، ئەگەر بڕی قەرزەکانی سەر عێراق بەسەر دانیشتوواندا دابەشبکەیت هەر تاکێک و منداڵی لەدایکبوویش نزیکەی 3 هەزار دۆلار قەرزار دەبێت.
ئەحمەد سەفار په‌رله‌مانتاری پارتی و بڕیاردەری لیژنەی دارایی و ئابووری لە پەرلەمانی عێراق بە ساتی رووداوی راگەیاندوه، عێراق قەرزێکی زۆری لەسەر کەڵەکە بووە و دەرچوون لەژێر ئەو بارە پێویستی بە کاتێکی زۆر دەبێ.
بەپێی زانیارییەکانی بریاردەری لیژنەکە ئێستا عێراق 23 ملیار دۆلاری دەرەکی قەرزارە، قەرزە کەڵەکەبووەکانی بەر لە ساڵی 2003ـیش نزیکەی 41 ملیار دۆلارن و قەرزە نێوخۆییەکانیشی گەیشتوونەتە 40 تریلیۆن دینار.
ئەحمەد سەفار ئاماژەی به‌وه‌شكردووه، "ئەگەر ئەم قەرزەش تێكڕا دابەشبکەین بەسەر ژمارەی دانیشتووانی عێراقدا، هەر تاکێک زیاتر لە 3 هەزار دۆلار قەرزار دەبێت و هەر منداڵێکیش کە لە دایک دەبێت نزیکەی 3 هەزار دۆلار قەرزار دەبێت."
بڕیاردەری لیژنەی دارایی پەرلەمانی عێراق باسی لەوە ش کرد، حکومەت لیژنەیەکی تایبەتی بۆ چاکسازی پێکهێناوە و دەبێت ئەو چاکسازییەش بکات، چونکە حكومه‌ته‌کانی پێشووتری عیراق ئابووریی وڵاتیان لە ئابوورییەکی بەرهەمهێنەوە گۆڕیوە بۆ به‌كارهێن و تاکە سەرچاوەی داهاتیش نه‌وته و داهاتی نانه‌وتی ناگاته 5٪.