نێچیرڤان بارزانی سەرۆكی هەرێمی كوردستان لەگەڵ ئیلبروس كوتراشێڤ باڵیۆزی روسیا لە عیراق و شاندێكی یاوەری كۆبۆوە.
بەپێی راگەیەنراوێك لەو كۆبونەوەیەدا دوایین پێشهاتە سیاسییەكانی عیراق و دواكەوتنی پرۆسەی هەڵبژاردنی سەرۆك كۆمارو پێكهێنانی حكومەتی نوێ و پەیوەندییەكانی روسیا لەگەڵ عیراق و هەرێمی كوردستان تاوتوێ كراون.
هەروەها نێچیرڤان بارزانی جەختی لە پێویستی گفتوگۆ و گەیشتنی هێز و لایەنە عیراقییەكان و هاریكاریی هاوبەشیان بۆ لێكگەیشتن و رێككەوتن لەسەر تێپەڕاندنی بەربەست و سەختییەكانی بەردەم پرۆسەی سیاسی لە وڵات كردۆتەوە.
لەبەشێكی تری ئەو كۆبونەوەیەدا شەڕو پێكادان لە ئۆكرانیاو كاریگەری و لێكەوتەكانی، تەوەرێكی دیكەی كۆبونەوەكە بون و هەردوولا هیوایان خواستوە بە زوترینكات كۆتایی بە شەڕو پێكادان بێت.
راشگەیەنراوە كە دوایین پێشهاتەكانی ناوچەكە بەگشتی و چەند پرسێكی دیكەی جێی بایەخی هاوبەش تەوەرێكی دیكەی كۆبونەوەكە بون.