نەوا
یانەی چێڵسی ئینگلیزی ئەنجامدانی گرێبەستی لەگەڵ یانەی لایپزیگ بۆ گواستنەوەی تیمۆ ڤێرنەر راگەیاند.
ئەمڕۆ یانە لەندەنییەكە لە بەیاننامەیەكدا ئاشكرایكرد، ڤێرنەری تەمەن 24 ساڵ بە مەرجەكانی گرێبەستەكەی رازی بوە و تا كۆتایی وەرزی ئەمساڵی بۆندسلیگا لەگەڵ لایپزیگ دەمێنێتەوە و پاشان پەیوەندی بە چێڵسییەوە دەكات.
ئەوەش رونكراوەتەوە، مانگی تەمموزی داهاتو ڤێرنەر پاش ئەنجامدانی پشكنینی پزیشكی، پەیوەندی بە هاوڕێ نوێیەكانیەوە دەكات لە بلوزی لەندەنی.
میدیای ئینگلیزی بڵاویكردەوە، ڤێرنەر بە بڕی 50 ملیۆن یورۆ گرێبەستەكەی كردوە و ساڵانەش موچەیەكی زیاتر لە 10 ملیۆن یورۆیی وەردەگرێت.
تیمۆ ڤێرنەر ئەستێرەی لایپزیگ یاریدەدەرێكی باش بو بۆ سەركەوتنی یانەكەی بۆ یەكەمجار بۆ خولی یانە پاڵەوانەكانی ئەوروپا و دەبێتە دووەم یاریزانیش چێڵسی بۆ وەرزی داهاتو گرێبەستی لەگەڵدا كردبێت، چونكە پێشتریش واژۆی حەكیم زەیاشی لە ئەیاكس ئەمستردامی هۆڵەندیەوە دەستكەوتبو.