ساڵانە لە باشووری كوردستان دەیان فیستیڤاڵ و كەرنەڤاڵ و كۆبوونەوەی گشتی ئەنجام دەدرێ، ئەوەی ئێمە هەستمان پێكردوە، تاكە شتێك كە بیری لێناكرێتەوە و خەمی لێناخورێت بابەتی ژینگە و ژینگەپارێزییە، بۆیە پاراستنی ژینگە لە چالاكییەكان و فێستیڤاڵەكاندا چەندین ستراتیژی گرنگ لەخۆدەگرێت كە بە داخەوە لای خۆمان كەمترین هەوڵی بۆ دراوە، لەوانە كەمكردنەوەی پاشماوە و دووبارە بەكارهێنانەوەی پاشماوەكان، بەكارهێنانی وزەی نوێبووەوە، پاراستنی ئاو، بەرزكردنەوەی هۆشیاری ژینگەیی لای بەشداربووان و ڕێكخەران، و جێبەجێكردنی وردی پلانەكانی بەڕێوەبردنی ژینگە.
بەڕێوەبردنی پاشماوە:
دابینكردنی چەندین شوێنی دیاری كراو بۆ كەرەستەی دووبارە بەكارهێنراوەكان (كاغەز، پلاستیك، كانزا، شووشە) لە شوێنە ڕوونەكان.
هاندانی بەكارهێنانی بەرهەمی دووبارە بەكارهێنراو لەبری بەرهەمی یەكجار بەكارهێنراو.
بەكارهێنانی پلاستیك بە هەموو شێوەكانییەوە كەم دەكاتەوە.
بەكارهێنانی وزەی نوێبووەوە:
بۆ كارپێكردنی ئامێرەكان پشت بە سەرچاوەی وزەی خۆر یان با ببەستین.
گواستنەوەی بەردەوام:
هاندانی بەشداربووان بۆ بەكارهێنانی گواستنەوەی گشتی، پاسكیل، یان بە پێ ڕۆیشتن.
دابینكردنی شوێنی وەستانی ئۆتۆمبێلی دیاریكراو بۆ  گواستنەوەی بەردەوامی سەردانیكاران.
ڕێكخستنی خزمەتگوزاری گواستنەوەی هاوبەش بۆ بەشداربووان.
 كەمكردنەوەی بەكارهێنانی ئاو:
هەر دزەكردنێك لە تۆڕەكانی ئاودا هەبێت چاك بكەرێنەوە.
لە هەر شوێنێك كە دەتوانیت ئامێری پاشەكەوتكردنی ئاو بەكاربهێنین.
دووبارە بەكارهێنانەوەی ئاوی پیس بۆ مەبەستی ناخواردنەوە (وەك ئاودێری باخچە).
هۆشیاری ژینگەیی:
ڕێكخستنی هەڵمەتی هۆشیاری سەبارەت بە گرنگی بەردەوامی و چۆنیەتی بەشداریكردن لە پاراستنی ژینگە.
پەیامە ژینگەییەكان لە پێشكەشكردنەكان یان چالاكییە كارلێكەكاندا تێكەڵ بكە.
هاوكاری لەگەڵ ڕێكخراوە ژینگەپارێزەكان بۆ بڵاوكردنەوەی پەیامی هۆشیاری.
پلاندانان و پێوانەكردن:
پەرەپێدانی ڕێسا و ڕێنمایی ڕوون بۆ بەڕێوەبردنی ژینگە لە فێستیڤاڵ و بۆنە و ئاهەنگەكاندا.
ئەنجامدانی هەڵسەنگاندنی كاریگەرییە ژینگەییەكان بۆ ڕووداوەكان و بڵاوكردنەوەی ڕاپۆرتی شەفاف لەسەر ئەنجامەكان.
داڕشتنی پلان بۆ وەڵامدانەوەی حاڵەتە فریاگوزارییە ژینگەییەكان.
بیهێنە پێش چاوی خۆت ئەگەر(۳۰۰) هەزار كەس بەشدار بێت لە ماوەی سێ ڕۆژدا.
هەر تاكێك، پەرداخێك ئاو بخواتەوە (۳۰۰) هەزار.
هەر تاكێك دوو كیلۆ میوە یا هەر بەرهەمێك بكڕێت، كیسی نایلۆنەكەی دەكاتە، ٦۰۰ هەزار دانە.
هەر تاكێك، خواردنێك بخوات و كەل و پەلی سەفەری بەكاربهێنێت، ئەوا نزیكەی(۱) ملیۆن پارچە لە خۆ دەگرێت، (كەوچك چەتاڵ، قاپ).
 هەر سێ كەسێك ئۆتۆمبیلێك بەكاربهێنێت كە هەیە یەك كەسیشیە، ئەوا نزیكەی ۱۰۰هەزار ئۆتۆمبێل بەكار دەهێنرێت....
كەواتە سەیری مەترسییە ژینگەییەكانی بكە لە داهاتوودا.
ئەگەر ئەم چەند خاڵەی باسمان كرد بە تایبەتی لە فیستیڤاڵی ساڵانەی (پایزە و هەنار) و سەرجەم چالاكییەكانی تر پەیڕەو بكرێ ئەوا كەمترین زیان بە ژینگە دەگەیەنرێت.
دەمەوێ، بیری هەموو لایەكی بهێنمەوە تەنها لە ماوەی سێ ڕۆژی ساڵی ڕابردووی فیستیڤاڵ، (۲٥) گەڵابە پاشماوە كۆ كراوەتەوە، كە بەڕاستی ئەمە پاشماوەی ناحیەیەكە لە ڕۆژانی ئاسایییدا.
دەكرێ ئەو فیستیڤاڵانە، ڕۆژەكانی زیاد بكرێ بۆ ئەوەی هەموو هاوڵاتییەك بتوانێ بەشداری بكات و قەرەباڵغی درووست نەبێت. 

                  مەعروف مەجید
سەرۆكی ڕێكخراوی ئایندە بۆ پاراستنی ژینگە

ئەو وتارانەی لە ماڵپەڕی رادیۆی نەوا بڵاودەكرێنەوە تەنها گوزارشت لە بۆچونی نوسەرەكانیان دەكات.