نەوا
حكومەتی هەرێمی كوردستان جەختدەكاتەوە، كە شایستە داراییەكانی موچەخۆران پارێزراو دەبێت. راشیگەیاند، یاسای چاكسازیی لە پاش پەسەندكردنی لە ماوەی 60 رۆژدا دەچێتە بواری جێبەجێكردنەوە.
بەیانی ئەمڕۆ سەرۆكی دیوانی ئەنجومەنی وەزیران و سكرتێری ئەنجومەنەكە و وتەبێژی حكومەتی هەرێمی كوردستان لە پرێس كۆنفرانسێكی هاوبەشدا رونكردنەوەیان لەبارەی پرۆژەیاسای چاكسازیی لە خانەنشینی و موچە و دەرماڵەكان داو رایانگەیاند، شایستە داراییەكانی موچەخۆران دەستكاری ناكرێت. هەروەك چۆن دەستكاری موچەی شەهیدانیش ناكرێت و یاسای چاكسازیی وارسی شەهیدان ناگرێتەوە و موچەكەشیان هاوتای عیراق دەكرێت.
هەروەها نوێنەرانی حكومەتی هەرێم جەختیانكردەوە لەوەی پرۆسەی چاكسازیی بەردەوام دەبێت و حكومەت هەوڵیش دەدات موچەی فەرمانبەرانی هەرێم هاوتای حكومەتی فیدراڵی بكەن.
وتیشیان "پرۆژەیاسای چاكسازیی كە رەنگە ئەمڕۆ پەرلەمان پەسندی بكات، پاش ئەوە یاساكە لە ماوەی 60 رۆژدا دەچێتە بواری جێبەجێكردنەوە".