نەوا
پێنج توشبوی دیكەی ڤایرۆسی كۆرۆنا لە دەڤەری راپەڕین تۆماركرا، كە دوو كەسیان ستافی تەندروستیین.
نیوەڕۆی ئەمڕۆ وەزارەتی تەندروستیی حكومەتی هەرێم رایگەیاند، لە بەردەوامی پشكنینەكان و گەڕان بەدوای گومانلێكراوان و توشبوان، پێنج  توشبوی دیكەی ڤایرۆسی كۆرۆنای نوێ COVID-19 لە دەڤەری راپەڕین دەستنیشانكراون.
ئاماژە بەوەشكراوە، لە توشبوەكان دووانیان ئافرەتن، یەكێكیان تەمەنی 70ساڵە و دانیشتوی گەڕەكی چۆمانی شارۆچكەی چوارقوڕنەیە، ئافرەتەكەی دیكەش تەمەنی 47 ساڵەو دانیشتوی گەڕەكی راپەڕینی رانیەیە.
هەروەها دوو منداڵی تەمەن 11 و 5 ساڵانی دانیشتوی گەڕەكی نەورۆزی رانیە توشبون و منداڵی توشبوەكانی دوێنێن، پیاوێكی تەمەن 37 ساڵیش، كە دانیشتوی گەڕەكی ماردینی رانیەیە، بە هەمان شێوە توشی ڤایرۆسی كۆرۆنا بوە.
وەزارەتەكە ئەوەشی ئاشكراكردوە، كە دوو لەو نەخۆشانە ستافی كەرتی تەندروستیین.