سه‌رۆكایه‌تی هه‌رێم ئیدانه‌ی كوشتنی ئه‌ندامانی خێزانێكی كورد له‌ توركیا ده‌كات

30/07/2021

نه‌وا
سه‌رۆكایه‌تیی هه‌رێمی كوردستان سەرکۆنەی هێرشی سەر خێزانێکی کوردی لە تورکیا كرد و رایگه‌یاند " ئەوانەی بەرپرسیارن لە ئەو تاوانە بێ هۆیە و دەبێت رووبەڕووی یاسا بکرێنەوە".
سەرۆکایەتیی هەرێمی کوردستان له‌ هه‌ژماری خۆی له‌ تۆڕی كۆمه‌ڵایه‌تیی تویته‌ر نووسیویەتی "سەرکۆنەی هێرشی سەر خێزانێکی کورد لە تورکیا دەکەین، هاوخەمی کەسوکار و خۆشەویستانی قوربانییەکانین". 
راشیگه‌یاندووه‌، "ئەوانەی بەرپرسیارن لە ئەو تاوانە بێهۆیە دەبێت، رووبەڕووی یاسا بکرێنەوە." 
 ئێواره‌ی رۆژی هه‌ینی ژماره‌یه‌ك توركی ره‌گه‌زپه‌ره‌ست هێرشیان كرده‌ سه‌ر خێزانێكی كوردی دانیشتووی ناوچه‌ی مارماره‌ی كونیا له‌ توركیا و حه‌وت ئه‌ندامی ئه‌و خێزانه‌یان كۆمه‌ڵكوژ كرد و دواتر خانووه‌كه‌شیان سوتاندن.
12ی ئەم مانگەش گروپێکی "توندڕەو" هێرشیان كردبوه‌ سەر هەمان خێزان و حەوت ئەندامی خێزانەکەیان بریندار کرد. ئەوکات بەشێک لەو گرووپە "توندڕەوە" دەستگیرکران و دواتر پێنج کەسیان ئازادکران. 

شەپۆلەکانی نەوا

Copyright © 2017 - Radio Nawa. Designed and Developed by Avesta Group