بە بڕیاری دادگای رەسافە دادگاییكردنی عەجاج ئەحمەد حەردان ئەلتكریتی ئەفسەرو بەڕێوەبەری پێشوی زیندانی نوگرە سەلمان بۆ 14/5 دواخراوە، لەكاتێكدا وتە 25 شاهیدحاڵ وەرگیراون.
بەگوێرەی زانیارییە بڵاوكراوەكان، عەجاج تكریتی نكوڵی لە بەشێك لەو تاوانانەدا كردوە كە لە نوگرەسەلمان ئەنجامدراوە، هەربۆیە دادگا دانیشتنەكەی دواخستوە تاوەكو لێكۆڵینەوەی زیاتر لە دۆسیەكەدا دەكەن، لە هەمانكاتدا بەشێكی زۆری ئامادەبوان باسیان لەو تاوانانە كردوە كە عەجاج تكریتی لە زیندانەكەدا ئەنجامیداوە.
هەرلەوبارەیەوە ئەیاد كاكەیی پارێزەری دۆسیەی عەجاج رایگەیاندوە، عەجاج كە بەڕێوەبەری زیندانی نوگرەسەلمان بوە دانی بە سەرجەم تاوانەكانیدا ناوە كە تاوانەكانی بریتین لە ئەشكەنجەدان و برسیكردن و دەسترێژیكردنە سەر ژنان و چەندین تاوانی دیكە.