نەوا-
بەڕێوەبەری گشتی تۆماركردنی خانوبەرە دەڵێت، پرۆسەی تاپۆكردنی زەوی فەرمانبەران بگاتە لایان تیمی تایبەتیان هەیەو دەست بە تاپۆكردنیان دەكرێت.
لوقمان عومەر بەڕێوەبەری گشتی تۆماركردنی خانوبەرەی هەرێم لە لێدوانێكدا رایگەیاندوە، هێشتا پرۆسەی تاپۆكردنی زەوی فەرمانبەران نەگەیشتوتە بەڕێوەبەرایەتیەكەیان، چونكە ئەو زەویانەی دابەشدەكرێن بەچەند قۆناغێكدا تێدەپەڕن و دوای دابەشكردنیان وردبینیان بۆ دەكرێت، زەوییەكان پارچەی گەورەن دواتر ئیفراز دەكرێن و دەكرێنە پارچە پارچە ئینجا رەوانەی بەڕێوەبەرایەتی گشتی تۆماركردنی خانوبەرە دەكرێن و پرۆسەی تاپۆكردنیان بەڕێوەدەچێت.
بەڕێوەبەری گشتی تۆماركردنی خانوبەرە وتیشی، هەركاتێك رێكارەكان لە شارەوانی تەواو بون و گەیشتە لای ئەوان ئەوا لەلایەن تیمەكانیانەوە دەستبەجێ پرۆسەی تاپۆكردنیان دەكرێت.
لەبارەی ئەو پارەیەی لەكاتی تاپۆكردنی زەوی فەرمانبەران وەردەگیرێت لوقمان عومەر بە سایتی فەرمی پارتی راگەیاندوە گە ئەو زەویانەی بەسەر فەرمانبەراندا دابەشدەكرێن نرخی تاپۆكردنیان دیاریكراوە لە سەنتەری پارێزگا چەندەو لە قەزاو ناحیەكانیش چەندە، بەڵام پارەیەكی زۆر نیە.