نەوا-
سەرۆكی یەكێتیی نیشتمانیی كوردستان راگەیەنراوێكی سەبارەت بە روداوەكانی ئەمدواییەی هۆتێل لالەزار لە سلێمانی بڵاوكردەوە.
بافڵ تاڵەبانی سەرۆكی یەكێتی بڵاویكردوەتەوە، گروپێكی میلیشیای نایاسایی كە لە دەرەوەی یاسا كاریان دەكرد چەند ناوچەیەكی نیشتەجێبونیان بە سەربازگە كردبو، هێرشیان كردە سەر هێزە فەرمییە ئەمنییەكان كە لەو كاتەدا ئەركی دەستگیركردنی داواكراوانیان پێ سپێردرابو كە ئەركیان پاراستنی گیان و ماڵی هاوڵاتیان و سەقامگیریی شارەكەیە، ئەم كارانەی گروپەكە ژیانی خەڵكی بێتاوانی خستە مەترسییەوەو بونەهۆی ئەوەی ئەو دامەزراوانەش كە ئەركیان پاراستنی كۆمەڵگەیە بە كەم بزانرێن.
سەرۆكی یەكێتی راشیگەیاندوە، هیچ كەسێك و هیچ گروپێكی میلیشیایی لە سەروی یاساوە نییە، چارەنوسی ئەو كەسانەی كە ئەو ئاسایش و سەقامگیرییەی كە قوربانییەكی زۆرمان لە پێناویدا داوە دەخەنە مەترسییەوە دەبێت لە رێگەی پرۆسەی یاسایی و دیموكراسییەوە بڕیاری لێبدرێت نەك لە رێگەی مەزەندەكردن و بانگەشەی میدیایی، ئاسایش وەك دامەزراوەیەكی ئەمنیی یاسایی حكومەتی هەرێم سەبارەت بە روداوەكە راپۆرتی خۆی بۆ رای گشتی بڵاوكردوەتەوە كە ئەركی هەموانە رێگە بە دەسەڵاتی دادوەری بدەن بەبێ هیچ دەستێوەردانێك بەردەوامبێت لە كارەكانی خۆی.
سەرۆكی یەكێتی داواشی لەدەسەڵاتی دادوەریی كردوە ئەركی خۆی بە پابەندبون بە یاسا جێبەجێ بكات و دادپەروەرو شەفاف بێت، لە هەمانكاتدا دڵنیاببنەوە لەوەی كە مافی هەمو تاكێك پارێزراوە، نابێت كاری گروپێكی میلیشیایی زاڵ بێت بەسەر ویستی هاونیشتمانیان بۆ ئاشتی، یەكڕیزیی و دیموكراسی.