نەوا-
دۆخی كارەبا لە هەرێم دوای هێرشەكەی سەر كێڵگەی كۆرمۆر ئاسایی دەبێتەوەو لیژنەیەكیش بۆ لێكۆڵینەوە لە روداوەكە پێكهێنراوە.
كەمال محەمەد ساڵح وەزیری كارەباو وەزیری سامانە سروشتییەكان (بە وەكالەت) لە لێدوانێكی رۆژنامەوانیدا باسی لەوەكردوە، ئاستی بەرهەمهێنانی ئێستای كارەبا لە هەرێمی كوردستان گەیشتوەتە نزیكەی 2 هەزار مێگاوات و پێشبینی دەكەن لە كاتژمێرەكانی داهاتودا كارەبا بگەڕێتەوە بۆ دۆخی پێش هێرشەكەی سەر كێڵگەی غازی كۆرمۆر، پێشتر ئاستی بەرهەمهێنانی غاز لە كێڵگەكەدا 530 ملیۆن مەتر سێجا بو، ئێستا گەیشتوەتە 404 ملیۆن پێ سێجا.
وەزیری كارەبا راشیگەیاند، لیژنەیەكی باڵای ئەمنی بە سەرۆكایەتیی وەزیری ناوخۆی عیراق و ئەندامێتیی وەزیری ناوخۆی حكومەتی هەرێم پێكهێنراوەو لێكۆڵینەوە لە هێرشەكە دەكەن بۆ ئەوەی هێرشكاران روبەڕوی دادگا بكرێنەوە، جەختیش لە پێویستیی دابینكردنی سیستەمی بەرگریی ئاسمانیی دژە درۆن بۆ كێڵگەی كۆرمۆر كراوەو كۆمپانیای دانا غازیش كە لەو كێڵگەیە كار دەكات هەمان داواكاریی هەیە.