دەستەی سەربەخۆی مافی مرۆڤ لەهەرێمی كوردستان راگەیەنراوێكی سەبارەت بە ئاڵۆزییەكانی گوندی لاجان لەسنوری شاری هەولێر بڵاوكردەوە كە بەهۆی توندوتیژییەوە گەنجێك كوژراو ژمارەیەكیش بریندار بون.
لەبەشێكی راگەیەنراوەكەی دەستەی سەربەخۆی مافی مرۆڤدا هاتوە، ئیدانەی هەر جۆرە توندوتیژیەك دەكەن كە ببێتە هۆی بەكارهێنانی چەك و كوشتنی لێ بكەوێتەوە، لەنزیكەوە تیمێكی تایبەت سەردانی شوێنی روداوەكەی كردوە لەگەڵ چەند كەسێكی مەدەنی گفتوگۆیان كردوە، هەروەها لەگەڵ پارێزگارو بەڕێوەبەری ئاسایشی هەولێر بۆیان دەركەوتوە كە لێكۆڵینەوە بەردەوامەو بەڵگەكان كۆكراونەتەوە بۆ دۆزینەوەی ئەو كەسانەی تەقەیان كردوە.
دەستەی مافی مرۆڤ وێڕای پشتگیری كردن لەداواكاری هاوڵاتیان بۆ دابینكردنی ژیان و مافەكانیان لەهەمانكاتدا پشتیوانی لەگردبونەوەكانیش دەكات بەڕێكاری یاسایی و مەدەنی دور لەتوندوتیژی و دژی بەكارهێنانی چەكن.