دەستەی كاتی سەرپەرشتی پرۆژەی نەتەوەیی لە راگەیەنراوێكدا داوا لە حزب و ناوەندە رۆشنبیری و كلتوریی و كەسایەتییەكان دەكات بەمەبەستی پشتیوانیكردنی پڕۆژەی یەكدەنگی نەتەوەیی پشتیوانیان بكەن.
لەبەشێكی راگەیەنراوەكەی دەستەی كاتی سەرپەرشتی پرۆژەی نەتەوەییدا هاتوە، وەك دەستەیەكی فراوان لەتوێژە جیاجیاكانی كوردستانیان لەئاستی ناوخۆ و دیاسپۆرا چەند خاڵێكیان كردوەتە بنەمای كاركردنیان، چونكە روداوەكانی ناوچەكە پێیاندەڵێت ناوچەكە بەگۆڕانكاری خێراو كاریگەردا تێدەپەڕێت ئەگەر هەیە بەشێك لەم گۆڕانكارییانە دەرفەتێكی مێژویی بۆ كورد بڕەخسێنن كە لە سەد ساڵی رابردودا چاوەڕێیان كردوە.
لەبەشێكی تری راگەیەنراوەكەدا هاتوە كە دەستەكەیان هەوڵی بنیاتنانی وتارێكی نیشتمانی هاوبەش، وتارێكی شارستانیانە دەدات كە زیاتر بچێتە خزمەتی پرسی نیشتمانی و رێزگرتن لە ماف و ئازادی گەلان و بەیەكەوە ژیان و دوركەوتنەوە لە ململانێی نادروستی سیاسی.
داواشیكردوە، تائێستا لە ناوەوەو دەرەوەی كوردستان پشتیوانی بۆ پڕۆژەكە راگەیەنراوە ئەم پشتیوانییە بۆ دۆزی كورد جێگەی دڵخۆشی و سوپاسگوزارییە، جارێكی تر داوا دەكەنەوە پشتیوانی ئەم پڕۆژە نەتەوەییە بكرێت و هەموان بەیەكەوە بەرەو قۆناغی داهاتویەكی باشترو پڕ ئومێدتر هەنگاوبنێن.
ئەمەی خوارەوە دەقی راگەیەنراوەكەی دەستەی كاتی سەرپەرشتی پرۆژەی نەتەوەییە:-
كوردستانیانی خۆشەویست...
ڕووداوەكانی ناوچەكە پێماندەڵێت، ناوچەكە بە گۆڕانكاری خێرا و كاریگەردا تێدەپەڕێت، ئەگەر هەیە بەشێك لەم گۆڕانكارییانە دەرفەتێكی مێژوویی بۆ كورد بڕەخسێنن، كە لە سەد ساڵی ڕابردوودا چاوەڕێمان كردووە، بەڵام دەبێ بزانین، گۆڕانكارییەكان بەبێ ئامادەباشی و یەكدەنگی كورد خۆی، مەرج نییە ئەو دۆخە بڕەخسێنێت، كە كورد دەیخوازێت، چونكە زامنكردنی مافەكانی هەر نەتەوەیەك پەیوەندی بە ئامادەیی و یەكریزی ئەو نەتەوەیە خۆیەوە دەبێت، بۆیە یەكگوتاری و یەكڕیزی كوردان لەم دۆخەدا چیتر وەك تەنها بژاردەیەكی سیاسی و حزبی نامێنێتەوە، بەڵكو دەبێتە پێویستییەكی مێژوویی، نەتەوەیی وجڤاكی بۆ پێناسەكردنەوە و ئامادەسازی بۆ دۆخێكی نوێ، دۆخێك، هەم دەرفەتی مێژوویی تێدا دەبینرێت، هەم مەترسی.
كوردستانیانی ئازیز...
ئێمە وەك دەستەیەكی فراوان لەتوێژە جیاجیاكانی كوردستانیان، لە ئاستی ناوخۆ و دیاسپۆرا، لە چەند ڕۆژی ڕابردوودا پڕۆژەیەكی یەكدەنگی نەتەوەییمان ڕاگەیاند. لە ڕاگەیاندنەكەدا ئەم شەش خاڵەمان بە بنەما گرتووە:
١. هەوڵدان بۆ بنیاتنانی گوتارێكی نیشتمانی هاوبەش، گوتارێكی شارستانیانە كە زیاتر بچێتە خزمەتی پرسی نیشتمانی و ڕێزگرتن لە ماف و ئازادی گەلان و بەیەكەوە ژیان.
٢. دووركەوتنەوە لە ململانێی نادروستی سیاسی، كاڵكردنەوەی كێشە نێوخۆییەكان و تێپەڕاندنی بەرژەوەندی بچووك و تەسكی حیزبی، سیاسی و ئایدیۆلۆژی.
٣. بەرژەوەندی باڵای نەتەوەیی و نیشتمانی بكرێتە چەقی كاری سیاسی هاوبەش. هەوڵدان بۆ دووركەوتنەوە لە هەر گوتارێكی پەڕگیری ئایدیۆلۆژی و توندڕەوی نەتەوەیی، كە خزمەت بە پرسی گەلی كورد نەكات.
٤. دروستكردنی ناوەندێكی هاوبەشی نیشتمانی بۆ گفتوگۆ و هەڵسەنگاندنی دۆخی ڕۆژهەڵاتی ناوەڕاست و ئەو دەوڵەتانەی كوردستانیان بەسەردا دابەش كراوە، ئاراستەی ململانێ و جەنگ بەرەو كوێ دەڕوات، كورد چی بكات، بەرژەوەندییەكانی گەلی كورد لە كام گۆشەی ململانێكاندا دەبینرێتەوە.
٥. پێكهێنانی دەستەیەكی نیشتمانی هاوبەش بۆ كاری سیاسی و دیپلۆماسی، پەیوەندی و گفتوگۆ لەگەڵ ناوەندە بڕیار بەدەستەكانی دنیا و ڕوونكردنەوەی دیدی هاوبەشی كوردی بۆ دۆخی ناوچەكە و مافەكانی كورد.
٦. هەوڵدان بۆ دروستكردنی چەترێكی نیشتمانی بۆ كاری هاوبەش، گفتوگۆ و ڕووبەڕووبوونەوەی قەیران و مەترسییە سیاسی، ئابووری، ئەمنی و كۆمەڵایەتییەكان. بەر لەوەی مەترسییەكان بگەنە نێو ماڵەكانمان، پلان و بەرنامەی ئەگەری ڕوودانیان، ڕووبەڕووبوونەوەیان دابنێین.
بەڕێزان...
تا ئێستا ژمارەیەك حزب و هێزی سیاسی، ناوەندی ڕۆشنبیری، كولتوری و كەسایەتی، لە ناوەوە و دەرەوەی كوردستان، پشتیوانی خۆیان بۆ پڕۆژەكە ڕاگەیاندووە. ئەم پشتیوانییە بۆ دۆزی كورد، جێگەی دڵخۆشی و سوپاسگوزاری ئێمەیە، هەر وەك چۆن بە هەستكردن بە بەرپرسیارێتی بەرامبەر بە پرسی ڕەوای گەلی كوردی دەبینین. لێرەوە بە دەرفەتی دەزانین، جارێكی دی داوا لە حزبەكان، ناوەندەكانی ڕۆشنبیری و كولتوری، كەسایەتی و تەواوی نیشتمانپەروەران بكەین، پشتیوانی خۆیان بۆ ئەم پڕۆژە نەتەوەییە پیشانبدەن و هەمووان بەیەكەوە بەرەو قۆناغی داهاتوویەكی باشتر و پڕ ئومێدتر هەنگاوبنێین و، بەیەكەوەش ئامادەسازی بۆ بەستنی كۆنفرانسێك بكەین بۆ گفتوگۆكردن لەبارەی چۆنێتی پلان و بەرنامەی كار، سەرخستن و دیاریكردنی میكانیزمەكانی خستنە سەرپێی پڕۆژەكە لەسەر ئاستی ناوخۆ و دەرەوە.
دەستەی كاتی سەرپەرشتی پرۆژەی نەتەوەیی
٣١/٣/٢٠٢٦