نەوا-
وەزارەتی دەرەوەی عیراق نیگەرانی حكومەوتی گەیاندە باڵیۆزی بەریتانیا لە عیراق بەهۆی لێدوانێكەوە كە پێیانوایە كاریگەریی لەسەر پەیوەندییەكانی نێوانیان دەكات.
لە راگەیەنراوێكدا هاتوە، محەمەد حسێن بەحرلعلوم لەگەڵ عیرفان سدیق باڵیۆزی شانشینی یەكگرتوی بەریتانیا كۆبوەتەوەو ناڕەزایی عیراقی پێگەیاندوە لەسەر ئەو لێدوانەی كە رایگەیاندوە حكومەتی عیراق سەرپێچی لە نەریتە دیپلۆماسییەكان دەكات و ئەمەش بە دەستوەردان لەكاروباری ناوخۆی عیراق دەزانن.
هەر لەكۆبونەوەكەدا بەحرلعلوم رایگەیاندوە كە ئەو هەڵسوكەوتەی باڵیۆزەكەی بەریتانیا لەگەڵ حوكمەكانی رێككەوتننامەی ڤیەننا بۆ پەیوەندییە دیپلۆماسییەكان یەكناگرێتەوە كە رێزگرتنە لەیاساو پەیڕەوی دەوڵەتی خانەخوێ و رێگریكردنیشە لە دەستوەردان لە كاروباری ناوخۆدا.
هەر لەكۆبونەوەكەدا بریكاری وەزارەتی دەرەوەی عیراق هانی باڵیۆزەكەی بەریتانیایداوە كە رێگربێت لە هەر لێدوان و چالاكییەكی هاوشێوەو هەڵسوكەوتێك بنوێنن كە پشتیوانی پەیوەندییەكانی نێوان هەردو وڵات بكات.