نەوا-
پۆلیسی دارستانی سلێمانی رایگەیاند، ئەم بەیانییە چوار رووداوی ئاگركەوتنەوە لە سنووری پارێزگای سلێمانی روویان داوە،كە زیانی گیانی لێنەكەوتووەتەوە بەڵام دارستان و باخی هاووڵاتیان سووتاون.
هێمن عەلی وتەبێژی بەڕێوەبەرایەتیی پۆلیسی دارستان و ژینگەی سلێمانی لە لێدوانێكدا رایگەیاند، چوار ئاگر لە چوار ناوچەی جیاوازی پارێزگەی سلێمانی كەوتوونەتەوە، كە ئەوانیش لە سەیرانگەی مێرگەپان، قەزای دووكان، ناحیەی سیتەك و شارباژێرن.
ئاماژەی بەوەشدا، ئاگرەكەی مێرگەپان توانرا كۆنترۆڵ بكرێت، بەڵام نزیكەی 10 بۆ 15 دۆنم پاوان و چەندین داری سروشتیی داربەڕوو سووتان.
باسی لەوەشكرد، ئاگرەكەی سنووری گوندی ئاڵاسیاوی ناحیەی سیتەك چەندین رەز و باخی هاووڵاتییانی سنوورەكەی سووتانوە، هاوكات 5 دۆنم زەویی پووشوپەڵاش و چەندین داری سرووشتی زیانیان پێگەیشتوە.