نەوا-
وەزیری دەرەوەی عێراق ڕایدەگەیێنێت، وڵاتەكەی ئامادەیە بەشداری لەپرۆسەی ئاوەدانكردنەوەی كەرتی غەززەدا بكات.
فوئاد حوسێن وەزیری دەرەوەی عێراق، سەرۆكایەتیی شاندی عێراقی كرد لەكۆبونەوەی نائاسایی وەزیرانی دەرەوەی ڕێكخراوی هاریكاریی ئیسلامی كە لەشاری جەدەی سعودیە بۆ تاوتوێكردنی دۆخی فەلەستین بەڕێوەچوو.
فوئاد حوسێن لەوتارەكەیدا ڕایگەیاند، عێراق بەهێزەوە لەگەڵ گەلی فەلەستین وەستاوە لەبەرامبەر ئەو كۆمەڵكوژییەی بەهۆی دەستدرێژییەكانی ئیسرائیلەوە ڕوبەڕوی دەبێتەوە.
هەروەها، بەگوێرەی ڕاگەیەندراوی وەزارەتی دەرەوەی عێراق، وەزیری دەرەوە باسی لەوەشكردوە، ئەم پێشێلكارییانە بەزاندنێكی ئاشكرای یاسای نێودەوڵەتی و مافەكانی مرۆڤن و تاوانێكی تەواون كە پێویستیان بەهەڵوێستێكی نێودەوڵەتیی بەپەلە و یەكلاكەرەوە هەیە.
فوئاد حوسێن وتیشی: عێراق پشتگیریی خۆی بۆ خەباتی گەلی فەلەستین بۆ دامەزراندنی دەوڵەتی سەربەخۆ دووپات دەكاتەوە و ئامادەیە بەشداری لە هەوڵەكانی ئاوەدانكردنەوەی كەرتی غەززە و كەمكردنەوەی ئازاری خەڵكی سڤیل بكات.